Nadine Fähndrich ha gudagnà avant la Norvegiaisa Lotte Udnes Weng e la Finlandaisa Johanna Matintalo, cun controllar a moda perfetga il final. La Svedaisa Emma Ribom, la dominatura dal sprint questa stagiun, ha mancà pervi da malsogna.
Fähndrich è gia stada la sperta en la qualificaziun a Beitostölen. Ed en il final ha ella profità, d'avair trenà la stad passada pli intensiv il stil classic dal sprint.
Igl è la terza victoria da Nadine Fähndrich en ina cursa da la cuppa mundiala. Avant dus onns a Dresden era ella vegnida gist duas giadas sisum il podest. L'emprim en il sprint, il di suenter ensemen cun Laurien van der Graaff en il sprint da team.
Valerio Grond meglier Svizzer
Tar ils umens ha Valerio Grond persvadì. En la qualificaziun ha il Grischun cuntanschì il quartmeglier temp, ed è s'avanzà fin en ils mezfinals. La finala è el sa rangà sco 11avel.