Tar il sprint n'èsi betg gartegià - ussa però en il skating. En la cursa 20 kilometers skating cun start da massa en il Goms cuntanscha la Lucernaisa Nadine Fähndrich il terz plaz - e realisescha uschia ses 10avel podest da sia carriera tar ina cursa da la cuppa mundiala.
En l'ultima runda avevan la victura Jessie Diggins dals Stadis Unids e la Svedaisa Frida Karlsson pudì distanziar il rest da las atletas. Nadine Fähndrich ha stuì economisar sias forzas. En l'ultima ascensiun ha'la pudì sa distatgar da las persequitadras, ed ha uschia pers mo 2 secundas sin la victura Jessi Diggins. Era idas per puncts en il Goms èn las soras Nadja e Marina Kälin sin ils plazs 15 e 25.
Cun Fähndrich èsi pia puspè da quintar. Sonda era ella gia vegnida en il final dal sprint. Quai suenter ch'ella era stada malsauna il december, n'ha betg pudì trenar sco previs ed aveva era stuì interrumper il tur de ski anticipadamain.