La istorgia dal HCD è ina lunga e va enavos passa in tschientaner. L’onn 1918 è l’emprim club da hockey da Tavau vegnì fundà. Da lez temp anc sco club per scolars e giasts. L’onn 1921 è lura il HCD sco nus enconuschain oz naschì. Be in onn pli tard sa participescha el per l’emprima giada al campiunadi svizzer. L’emprima victoria da quest campiunadi è reussida al club be quatter onns pli tard, il 1926.
Dapi lura dastga il club – cun pitschens deturs en ils onns 70 e 90, nua ch’il club è descendì en ligas pli bassas – festivar buns success a la testa dal mund da hockey svizzer. Cun 31 titels è il club da hockey da Tavau oz il campiun da records.
Il Lausanne HC e ses rodeo da ligas
In zic pli giuven ch'il club da Tavau è la squadra Lausanne HC. Ella exista gia dapi 1922, gioga dentant pèr dapi l’onn 1949 sut il num Lausanne HC. Sur ils decennis ha la squadra da Losanna gì da cumbatter in per giadas per ses plaz en la liga naziunala. L’onn 1981 n'ha il Lausanne HC betg pudì tegnair ses plaz ed è crudà en la secunda liga. Cun quai betg avunda: Il 1984 èn els schizunt descendì fin en la terz auta liga. Quest rodeo tranter ascender e descender d’ina liga a l’autra è lura cuntinuà sur plirs decennis. Dapi la stagiun 2012/13 po la squadra tegnair ses rang en la liga naziunala.
Ils duels directs
La stagiun 2023/24 èn las duas squadras fruntadas quatter giadas ina sin l'autra. Ils duels èn stads fitg gulivs – cun in avantatg per Losanna, ch'ha gudagnà trais giadas. Ina prevista sin ina squadra favurita è quasi nunpussaivla. Quai ch'ins po dentant dir è, che las schanzas per in gieu bun e captivant èn autas.
Ina survista:
- 01.10.23 HCD – Lausanne HC 1:2 (suenter prolungaziun)
- 02.11.23 Lausanne HC – HCD 1:0
- 23.01.24 Lausanne HC – HCD 5:6 (suenter penaltis)
- 18.02.24 HCD – Lausanne HC 1:2
La stagiun 2023/2024 è stada ina da record
En la liga naziunala da la stagiun 2023/2024 hai dà in record d’aspectaturas ed aspectaturs. Bun 2,6 milliuns persunas han laschà plaschair ils gieus al lieu. En media visitan 7’130 persunas las partias da la pli auta liga da hockey sin glatsch. Er il HCD ed il Lausanne HC han profità da quest svilup positiv. Omaduas equipas han in plus envers l'onn passà.
| Equipa | Total aspectaturs 23/24 | Media aspectaturas 23/24 | Differenza tar la davosa stagiun |
| HCD | 131'789 | 5'069 | +91 |
| Lausanne HC | 189'544 | 7'290 | +191 |
HCD è pront per attatgar
Betg main che 13 dis pausa ha Tavau gì tranter il davos gieu da qualificaziun e l'emprim gieu da playoff dumengia saira. Per in hockeyan è quai in lung temp senza gieu cumpetitiv sin il glatsch u sco l'attatgader dal HCD, Enzo Corvi di: «13 dis pausa è simplamain memia lung». Tenor el fissi meglier sch'ils megliers otg da la qualificaziun duessian playoff e ch'i na dess betg «play-ins».
Uschia èsi ils davos dis stà da trenar ed anc ina giada trenar. Tranter auter è la tactica è stada en il focus, cun sa preparar sin l'adversari Losanna. Plinavant èsi è stà da bajegiar si ina tscherta intensitad en vista als playoffs.
