Al EV Zug gartegia il pass en il mezfinal dals playoffs. Il victur da la qualificaziun a gudagnà il sisavel gieu dal quartfinal cunter il SC Berna, ordaifer cun 1:0. Zug decida uschia la seria cun 4:2 en sia favur.
Il sulet gol dal gieu marca Jérôme Bachofner en la 38avla minuta. La meglra schanza da vart dals Bernais a Simon
Sterchi gì, cura ch’el ha sajettà en la latta en la 50avla minuta. Sco proxim adversari spetga il EV Zug ils Rapperswil-Jona Lakers, ils 10avels da la qualificaziun.
Cun la segunda tentativa
Ils ZSC Lions avevan anc manchentà la mesemna l’emprima schanza da far tut cler cunter Losanna. Uss gudognan
ils Turitgais il gieu numer 6 a chasa cun 3:0 – ed elimineschan Losanna en la seria cun 4:2.
Curt suenter che mez dal gieu era passà, han ils Lions marcà ils gols al 2:0 tras Denis Hollenstein e Simon Bodenmann. Per il resultat final al 3:0 ha lura Ryan Lasch procurà. En il segund mezfinal dals playoffs fruntan uschia ils ZSC Lions e Genevra-Servette in sin l’auter, pia il duel dal 5avel cunter il 6avel da la qualificaziun.
Ils mezfinals dals playoffs dal campiunadi svizzer cumenzan la dumengia saira, e per quels vala il modus «best of 5».