Tavau sco er ils ZSC Lions èn dus clubs da tradiziun che san co ins gudogna titels da campiun svizzer. Il HCD dumbra 31 titels ed ils Turitgais 9 titels. Il duel tranter las duas equipas da tradiziun è er in duel da gronda rivalitad, gia dapi plirs decennis. Igl è er ina battaglia tranter ils citadins ed ils muntagnarads. Emoziuns èn garantidas sche questas duas equipas fruntan en ils playoffs in sin l'auter.
Per Guido Schaniel vegn l'effizienza a giugà in'impurtanta rolla en questa seria. Per el sajan las duas equipas gulivas. La differenza haja savens il sang fraid fatg en ils ultims gieus. Ed in zic mal il chau al Surmiran fa er il goli dals Lions, Šimon Hrubec. Statisticamain è il Tschec il meglier goli da la liga. Il HCD haja cun Sandro Aeschlimann e Gilles Senn er dus buns golis, ma quest goli saja «betg normal».
Durant la qualificaziun da 52 gieus n'è la differenza betg stada gronda tranter las duas equipas. Ils ZSC Lions han finì la qualificaziun sin plazza 4, il HCD sin plazza 5. In sguard pli detaglià mussa dentant ch'il «Zett» ha gudagnà tut ils quatter duels directs.
| 29-10-2022 | HCD 0:5 ZSC Lions |
| 19-11-2022 | ZSC Lions 4:3 HCD |
| 04-12-2022 | HCD 1:4 ZSC Lions |
| 02-03-2023 | ZSC Lions 4:1 HCD |
Clera chaussa pudessan ins pensar. Gist l'ultim duel, il cumenzament da mars mussa dentant che la differenza tranter las duas equipas n'è forsa tuttina betg uschè gronda. Ils ZSC Lions han bain gudagnà il gieu, Tavau ha dentant gì dapli occasiuns. La fin finala ha dentant l'effizienza mancà.
Fans avessan giavischà auter adversari
Mo cler, ils ZSC Lions n'èn betg propi l'adversari preferì dal HCD. Er ils dus fans da Tavau Guido Schaniel (73) da Savognin e Bea Caduff (53) da Breil avessan giavischà in auter adversari en il quartfinal dals playoffs. Els èn omadus dapi blers onns fans passiunads dal Club da Hockey da Tavau. Da perder haja il HCD nagut, manegia Bea Caduff. E quai saja er ina schanza.
I sto simplamain constar dad A fin Z. Lura ha il HCD er ina schanza da gudagnar la seria.
Quest goli da Turitg tegna schon betg normal.
Ils dus fans Rumantschs èn conscients ch'i spetga ina dira lutga sin il Club da Hockey da Tavau. Dentant tippeschan omadus sin il medem resultat en la seria: Sin ina victoria da 4:3 per il HCD.
Or da l'archiv
