La fin d’emna da las cursas da passlung en il Goms era la fin d’emna da las premieras en la cuppa mundiala per dus giuvens passlungists engiadinais. Fabrizio Albasini da San Murezzan ha pudì ir per l’emprima giada a la partenza dad ina cursa da distanza da la cuppa mundiala. Noe Näff da Sent è sa participà a las cursas da sprint. Uschia era el tut en ina giada part da l’elita mundiala cun Johannes Klaebo ubain Federico Pellegrino.
Anc mai vis insatge uschia
Las cursas da la cuppa mundiala en il Valais han carmalà las massas. Durant ils dus dis da las cursas da la cuppa mundiala han 10'000 fans dal sport da passlung persequità las cursas al lieu. Insatge uschia n'ha il giuven passlungist Noe Näff anc mai vis. Cler ch’el ha vulì dar tut tar sia emprima cursa da la cuppa mundiala, e cler ch’il giuven passlungist ha vulì mussar insatge als fans.
Avant la cursa era il giuven da 20 onns enorm gnervus. Quella gnervusitad è restada. Era sch'il trenader ha ditg avant la cursa da far plaun, è el rivà suenter l’emprima ascensiun en il blau ed el ha stuì laschar scappar la concurrenza.
Experientscha enorma
L’emprima giada en il ravugl da la cuppa mundiala da passlung è stà per Noe Näff insatge fitg spezial. Tut auter percunter las cursas da la cuppa d’Europa, là nua che Näff ha fatg durant quest enviern la gronda part da las cursas. Perquai ch’el ha mussà bunas prestaziuns en la cuppa d’Europa, ha el a la fin era pudì ir a la partenza dad ina cursa da la cuppa mundiala. E suenter l’experientscha ch’el ha fatg en il Goms èsi cler: El vul empruvar da puspè far il pass tranter ils megliers dal mund.