Siglir tar il cuntegn

Header

cuntegn

Premiera olimpica Olimpia è il bonus per in onn da siemi

L'ultim onn è tut ì enorm svelt per il sprinter da Cuira. El è currÌ da success a success e po uss perfin currer als gieus olimpics. William Reais, in da quels exempels tge ch'è pussaivel en il sport.

L'atun passà eran ils gieus olimpics ses grond siemi. Lura lavurava William Reais parzial tar ina banca, gieva fin 6 giadas l'emna da Cuira a Turitg per trenar. Entant èn ils gieus olimpics realitad ed il sprinter stat avant sia premiera olimpica. Tar il currer, ch'è sia gronda passiun, è William Reais vegnì pir cun 16 onns. Avant deva el ballape. El ha fatg svelt svilup e progress. Surtut l'onn passà è tut ì fitg svelt. Record svizzer sur ils 200 meters, medaglia d'aur al campiunadi europeic en la categoria U23, selecziun per ils gieus olimpics a Tokio. Dal mez-profi al profi che po uss grazia a sponsurs viver dal sport. Viver ses siemi, sco l'atlet da 22 onns gi. Turitg è entant era sia basa nua ch'el abita.

audio
William Reais e ses siemi olimpic
ord Actualitad dals 02.08.2021. Maletg: RTR
laschar ir. Durada: 3 minutas 58 Secundas.

El na possia anc strusch chapir e realisar tge che saja tut marschà en quai ultim onn. Uss possia el propi viver il siemi olimpic, esser part da quella gronda famiglia e surtut dastgar represchentar il Grischun, la Svizra a Tokio saja ina honur e fitg spezial. Spezial era, ch'el possia parter il siemi olimpic cun ses fitg bun ami Jason Joseph che curra ils 110m obstachels. Els dus partan era la chombra en il vitg olimpic.

video
William Reais è in da dus Grischuns als gieus olimpics
Or da sil punct dals 23.07.2021.
laschar ir. Durada: 1 minuta 36 Secundas.

Tge ch'è pussaivel a sia premiera olimpica na possia el betg dir. Tut saja nov, tut spezial. Il sulet ch'el possia far – currer uschà svelt sco pussaivel. Gugent pli svelt che ses record persunal da 20,24 secundas. E lura guardar tge che capita, sche sia premiera saja a fin gia suenter la qualificaziun ubain sch'i tanscha da vegnir en il mezfinal, u perfin final. Suenter tut ils success da l'ultim onn, emprova il sprinter grischun cun ragischs en il Portugal ed en l'Angola, tutta cass da prender cun il schlantsch, surtut entras sia medaglia d'aur al campiunadi europeic.

La premiera da William Reais

Avrir la box Serrar la box

L'urari per William Reais (sprint sur 200m) vesa ora uschia:

  • ils 3 d'avust 13:50 mezfinals
  • ils 4 d'avust vers las 15:00 final

RTR tegn sin il current via radio e sin rtr.ch.

RTR actualitad 07:00

Artitgels legids il pli savens