A Sepp Blatter vegn renfatschà defraudaziun, gestiun malfidaivla e falsificaziun da documents. Michel Platini sto sa giustifitgar avant dretgira a Bellinzona pervi da cugliunaria, sa participar a defraudaziun e gestiun malfidaivla sco er falsificaziun da documents.
Michel Platini è stà tranter il 1998 ed il 2002 cussegliader da Sepp Blatter ch'era lura president da la Fifa. Passa otg onns suenter il mandat sco cussegliader ha Platini pretendì dus milliuns francs da la Fifa. En collavuraziun cun Sepp Blatter è questa summa vegnida pajada l'entschatta 2011. Tenor la Procura publica federala cumprovan las retschertgas che quest pajament saja vegnì fatg senza basa legala. La Fifa saja vegnida donnegiada en ses possess e Michel Platini enritgì illegalmain.
