Il podest:
- Corinne Suter SUI (1:34,27)
- Kira Weidle GER (+0.20)
- Lara Gut-Behrami SUI (+0.37)
Suenter duas medaglias d'argient ed ina da bronz, gudogna Corinne Suter cun 26 onns sia emprima medaglia d'aur a campiunadis mundials. Ella ha mussà davent da sisum fin giusut ina cursa fitg ferma ed uschia pudì sa distanziar da la concurrenza.
Ina ferma prestaziun ha era Lara Gut-Behrami mussà. La campiunessa mundiala dal super-g era tar ils emprims temps intermediars anc la pli sperta, ha lura dentant fatg pitschens sbagls ed uschia crudada enavos sin plazza 3.
Ina buna cursa ha era Michelle Gisin mussà. Ella vegn 5avla e manchenta il podest be per 13 tschientavels.
Grazia a las duas plazzas da podest ha la Svizra gia gudagnà quatter medaglias als campiunadis mundials a Cortina. Tuttas medaglias èn vegnidas recaltgadas da Corinne Suter (1x aur ed 1x argient) e Lara Gut-Behrami (1x aur ed 1x bronz).
Umens damaun en acziun
Damaun stat la cursa rapida dals umens sin il program. La gronda speronza svizra en lezza cursa è Beat Feuz, il campiun mundial da San Murezzan il 2017. Medemamain spannegiads dastgan ins esser sin il Grischun Carlo Janka, che è sa classa 3 giadas questa stagiun tranter ils megliers 10 en questa disciplina.