Irene Cadurisch (26) ha finì surprendentamain l'emprima cursa da Biatlon dals gieus olimpics 2018 cun la plazza 8 ed uschia cun in diplom olimpic per la Svizra.
La Bregagliotta è l'emprima surpraisa positiva svizra
La curridra bregagliotta ha fatg tar il tir il meglier temp da tut las 87 participantas ed ha stuì far be ina runda da chasti. Enfin tar il segund ultim temp era Cadurisch anc sin plazza 4. Sin ils ultims meters ha ella dentant anc perdì intginas secundas.
En la coppa mundiala da questa stagiun n'eri enfin uss betg reussì a Cadurisch da far ina plazza tranter ils emprims 40.
La tudestga Laura Dahlmeier gudogna suveranamain
A Laura Dahlmeier (24) èsi gartegià sco unica favurita da far il sprint senza culp fallà. Uschia gudogna ella cun 24,4 secundas avantatg avant la Norvegiaisa Marte Olsbu e la Tscheca Veronika Vitkova.
Selina Gasparin n'ha betg tutgà en il nair
Gia tar las emprimas duas staziuns da trair en venter n'èsi betg reussì a l'Engiadinaisa da tutgar en il nair. Uschia ha la vice-campiunessa olimpica da Sotschi stuì sa cuntentar suenter 4 rundas da chasti cun la 41avla plazza. Lena Häcki terminescha la cursa sin plazza 26, Elisa Gasparin sin plazza 31.
RR novitads 14:00