L'emprima mesadad dal gieu da test cunter la Ghana n'aveva anc betg l'intensitad d'in gieu dal campiunadi mundial. Lura, en la 70avla minuta, èsi dentant ì svelt. Salisu po tutgar cun il chau en il gol svizzer suenter che la balla è siglida enturn en la zona da penalti svizra. Gnanc quatter minutas pli tard augmenta Semenyo per la Ghana sin 2:0 suenter in sajet rebattì da Sulemana.
L'equipa svizra ha cumenzà bun ed er gì ina schanza en la 6avla minuta tras Ruben Vargas ed avant la pausa tras Breel Embolo. Noah Okafor aveva suenter la pausa betg reussì cunter il goli ghanais. La defensiun svizra aveva dentant tralaschà da retegnair Sulemana avant il 0:2 tras ils Ghanais.