La Frantscha ha gudagnà cun 2:0 encunter il Maroc. Suenter che Theo Hernandez ha sajettà l'emprim gol gia suenter 5 minutas, èn Les Bleus sa retratgs per gronda part en lur mesadad da la plazza ed han surlaschà als Marocans da far il gieu. Quels èn sa mussads offensivs, dentant memia pauc effizients ed han manchentà pliras giadas d'egualisar la partida. La finala ha lura Randal Kolo Muani sajettà en minuta 79 il segund gol e cun quai decidì la partida.
Il Maroc è stada l'equipa da surpraisa da quest turnier. Suenter lur victoria cunter la Spagna ha il Maroc er gì battì il Portugal cun 1:0. Ils Nordafricans èn stads sco emprima equipa africana insumma en in mezfinal d'in campiunadi mundial da ballape.
En il final da dumengia frunta la defensura dal titel, la Frantscha, sin l'Argentina. Sonda proxima giogan il Maroc e la Croazia per decider plazza 3.
Croazia – Argentina 0:3
L'Argentinia, cun il superstar Lionel Messi, ha cuntanschì il final dal campiunadi mundial da ballape en il Qatar. Ils Argentins han gudagnà la partida da mezfinal cunter la Croazia quai cun 3:0.
L'emprim gol da la partida ha sajettà Lionel Messi en la 34avla minuta, quai è stà in penalti pervia d'in foul. Ils dus ulteriurs gols ha sajettà Julian Alvarez en la 39avla e la 69avla minuta.
L'Argentinia è per la 6avla giada en il final d'in campiunadi mundial da ballape. L'Argentina ha la dumengia la schanza da daventar per la terza giada campiun mundial. Il final è en il stadion da Lusail.