La Frantscha ha eliminà l'Engalterra en il quartfinal dal campiunadi mundial da ballape en il Qatar. Ils Franzos han battì ils Englais en ina partida gulivada cun 2:1 grazia a gols da Tchouameni e da Giroud. Tranteren ha Kane pudì egualisar per penalti. Curt avant la fin ha il chapitani dals «Three Lions» sajettà in segund penalti sur il gol ora ed uschia manchentà la schanza da egualisar danovamain.
En il mezfinal frunta la Frantscha sin il Maroc. Ils Nordafricans han battì sensaziunalmain il Portugal cun 1:0 e stattan sco emprima squadra africana insumma en in mezfinal d'in campiunadi mundial da ballape.