L’onn 2023 stat sut l’ensaina da la qualificaziun per il proxim grond turnier, il campiunadi europeic en Germania. Tut ils 10 gieus da qualificaziun han lieu tranter la fin mars e la fin november. Quai è la consequenza dal campiunadi mundial durant l’enviern a Qatar ch’ha sfurzà che la Nations League sto far pausa per ina stagiun. Sulet il turnier da final cun la Croazia, la Spagna, l’Italia e l’Ollanda datti mez zercladur.
La Svizra ha lantschà sia campagna da qualificaziun ils 20 da mars. Lura è l’equipa naziunala sa radunada per in trenament public a Basilea. Il venderdi è l’equipa da Murat Yakin sgulada direcziun Belgrad. La sonda saira a las 18:00 uras fruntan ils Svizzers en l’emprim gieu da qualificaziun a Nove Sad en la Serbia sin la Bielorussia, in gieu senza aspectaturs. Be trais dis pli tard dat la Svizra il proxim gieu a Genevra encunter l’Israel.
Cun ina maschaida da giugaders cun gronda experientscha ch’han gia giugà ina rolla impurtanta a Qatar, giugaders che returnan en il cader sco Zeki Amdouni u Cedric Itten e cun giugaders novs sco Dominik Schmid vul la Svizra sa qualifitgar per il proxim campiunadi d’Europa. Il trenader naziunal sto dentant era desister sin intgins giugaders ch’èn blessads sco per exempel Xherdan Shaqiri u Breel Embolo.
Insatge è dentant cler: Tut auter ch’ina qualificaziun per il campiunadi d’Europa l’onn proxim en Germania fiss ina blamascha, er perquai ch’il segund da gruppa vegn er ad esser da la partida. La Svizra è cleramain la ferma equipa en questa gruppa. En ina tala rolla da favurit n’è la Svizra anc mai stada.