Ils quatter gols per la Svizra han sajettà Noah Okafor (48'), Ruben Vargas (57'), Cedric Itten (72') e Remo Freuler (91'). Plinavant han Okafor e Xherdan Shaqiri, ch'ha giugà ses 100avel gieu en il tricot da la naziunala svizra, tutg be la petga e dus gols entras Itten e Mario Gavranovic èn vegnids annullads pervia d'in offside. L'equipa da Murat Yakin ha dominà e dictà il gieu davent da l'emprima minuta e procurà per ina notg magica a Lucerna.
La naziunala svizra è uschia per la 5avla giada en seria da la partida ad in grond turnier. La basa per quest success han ils Svizzers mess cun giugar en questa qualificaziun duas giadas pari encunter il favurit, l'Italia. Applaus survegn er il trenader naziunal Murat Yakin, ch'ha suenter l'èra Vladimir Petkovic formà in'equipa che dat vinavant in ballape attractiv e plain success.