Il campiunadi mundial en il Katar vegn ad esser l'emprim campiunadi mundial da ballape durant l'enviern. Dals 21 da november 2022 fin ils 18 da december 2022 vegn il turnier ad avair lieu.
Che la FIFA ha surdà quest campiunadi mundial al Katar procura gia dapi la suradada per grondas discussiuns. En il fratemp è er enconuschent ch'intginas vuschs da delegads èn stadas cumpradas.
Per propi en la critica è il Katar vegnì durant la construcziun dal stadions ils ultims onns. Tenor retschertgas da la gasetta inglaisa «Guardian» sajan fin qua 6500 luvrers esters morts sin ils plazzals dal campiunadi mundial. Per gronda part umens giuvens ord pajais da l'Asia. Il comite d'organisaziun discurra percunter da 34 morts. Il dumber saja pitschen cumpareglià cun auters gronds plazzals sin l'entir mund, din ils organisaturs.
Critica envers il Katar datti perquai pli e pli savens er da federaziuns da ballape e da giugaders. Il plaid «boicot» croda adina puspè enturn quest campiunadi mundial. Ch'i vegn dentant propi uschè lunsch, è grev da s'imaginar
La Svizra sa concentrescha sin il sportiv
En la gruppa da qualificaziun frunta l'equipa da Vladimir Petkovic sin la Bulgaria, l'Italia, l'Irlanda dal Nord e sin la Lituania. L'emprim da la gruppa è direct qualifitgà per il CM, il segund ha la pussaivladad da sa qualifitgar via gieus da barrage.
En l'emprim gieu frunta la Svizra ordaifer sin la Bulgaria. Tut auter che ina victoria fiss ina trumpada.
Nus na dastgain betg dà arrogant.
La qualificaziun directa per il campiunadi mundial en il Katar vegn tut auter che simpla. L'Italia è il favurit en questa gruppa. Cunter las ulteriuras naziuns en la gruppa vala dentant la Svizra sco cler favurit.