Al turnier da Cincinnati stat Jil Teichmann en ils mezfinals. Ella ha gudagnà il duel svizzer cunter la campiunessa olimpica Belinda Bencic – quai cleramain en dus sets cun 6:3 e 6:2. Suenter 73 minutas ha la giugadra da 24 onns realisà sia segunda balla da matsch.
Jil Teichmann ha recaltgà gist trais giadas il service da Bencic: tar il 3:1 en l’emprim set, e tar il 1:0 e 4:1 en il segund set. E ses agens services ha Teichmann realisà tuts. Cunter tschintg ballas da break ha ella stuì sa defender, trais da quellas en l’emprim set.
En il mezfinal frunta Jil Teichmann uss sin la Tscheca Karolina Pliskova, il numer 4 dal mund. Quella ha profità che la Spagnola Paula Badosa ha stuì dar si la partida durant il segund set. Il mezfinal Teichmann cunter Pliskova è questa sonda saira las 9 temp svizzer.