Quai n'èn betg stads simpels mais per la US Schluein Glion. Malgrà ch'i n'è betg vegnì dà ballape a Crap Gries pervi da corona, è tuttina marschà pulit bler tar il club da la Foppa. Blers giugaders da tschep, sco il capo-tiragols Lars Caduff u Marino Cavegn, han bandunà il club. Omadus han midà tar Cuira 97.
Er ils giugaders da la Tschechia Patrick Gilian e Miroslav Routek èn ids davent. Uschia è il schef da sport, David Caduff stà confruntà l'ultim temp cun la sfida, da metter sin pais in'equipa ch'è buna avunda da tegnair pitg en la 2. liga regiunala durant la proxima stagiun.
L'equipa che va en il cumbat per tegnair la 2. liga saja fitg giuvna, di David Caduff. I saja dentant er ina equipa cun bler potenzial. Els hajan recrutà intgins juniors che devan l'ultima stagiun anc tar ils juniors B en la Coca Cola League. Plinavant han giugaders da la segunda equipa da Schluein Glion fatg il pass tar els, e grazia al nov trenader Mate Lekishvili hajan els era pudì engaschar trais giugaders da Cuira. Lekishvili ch'è dapi il zercladur il scheftrenader, trenava avant la segund'equipa da Cuira en 3. liga. Las ultimas emnas ha el laschà giugar in zic ses contacts.
La stagiun vegn ina sfida
Il schef da sport è pertschert ch'i spetga ina greva stagiun sin la giuvna equipa da Schluein Glion, ch'è en media mo insatge pauc sur 20 onns veglia. El spetga dentant ch'ils giugaders rutinads sco Luca Vinzens, Tiziano Vinzens, Serafin Bundi u Luzi Dermont tiran il char, er en fasas pli grevas.
Nus vesain ils proxims mais, sche quest'equipa è madira per la 2. liga regiunala.
David Caduff na vul betg far squitsch. I saja impurtant da dar peda, spezialmain als giuvens che fan da nov part da l'equipa. Cun la ristga, ch'i na tanschia forsa betg da tegnair la liga. Tuttina è il schef da sport optimistic per la nova stagiun, il potenzial dal cader saja fitg grond, manegia Caduff.