Igl è franc ina surpraisa sch'ins guarda sin la tabella da la terza liga. Valposchiavo Calcio, l'equipa da la vallada taliana, è a la testa da la tabella. Quai cun 25 puncts ord ils emprims nov gieus. 34 gols han els sajettà ed incassà be 6. En tscherts gieus ha l'equipa dal trenader talian Luigi Zugnoni perfin briglià cun in ballape da spectacul:
| 10-09-2022 | US Schluein Glion – Valposchiavo Calcio | 1:6 |
| 01-10-2022 | FC Tusaun Cazas – Valposchiavo Calcio | 0:6 |
| 08-10-2022 | Valposchiavo Calcio – FC Triesen | 7:1 |
| 16-10-2022 | Valposchiavo Calcio – CB Domat | 6:1 |
Il sulet gieu da campiunadi che n'è betg vegnì gudagnà è stà l'emprim, mez avust. A chasa encunter Schaan hai dà in pari da 1:1. Dapi quest gieu èn ils Puschlavins dentant stà sin ina unda da success.
Motivs che Valposchiavo Calcio noda actualmain sin questa unda da success dettia tenor il giugader da mez Valerio Plozza (34) plirs. Offensiv hajan els cun il rutinà Nicolò Pola (31) e cun il giuven Mattia Cathieni (19) dus attatgaders extraordinaris per la terza liga.
Ma er davostiers ha l'equipa enta pugn ils adversaris. Qua menziuna Valerio Plozza ils dus frars Alessandro e Massimiliano Fiorina en la defensiun centrala che tegnan ensemen la defensiun. Ord il gieu survegnan els strusch gols. Quatter dals sis cuntergols questa stagiun hajan els incassà suenter situaziuns da standard.
Gieu cunter Schluein è stà impuls decisiv
Al cumenzament da la stagiun ha Puschlav duvrà intgins gieus per propi vegnir en il «flow», sco Valerio Plozza raquinta. Ma dapi il gieu cunter Schluein Glion mez settember èsi grev da franar els. 6:1 han els gudagnà il gieu ordaifer a Schluein e quai malgrà che las premissas eran tut autras che bunas.
Noss trenader vuleva dar forfait per il gieu cunter Schluein Glion.
Il mardi avant il gieu sajan els mo stads en set durant in trenament. Fitg blers sajan stads en vacanzas. Lur trenader haja lura ditg ch'i duain dar forfait quest gieu, er per dar in signal als giugaders che van en vacanzas durant la stagiun.
Dar forfait in gieu? Ils giugaders rutinads enturn Valerio Plozza n'han betg vulì schar tiers quai. Cun mo 12 giugaders èn els lura ids a Schluein cun la finamira da betg perder memia aut. Vegnì èsi dentant, sco igl è enconuschent, tut auter. Valposchiavo Calcio ha demontà il favurit Schluein Glion. Ch'i vegnan suenter quest gieu en ina tala spirala da success n'avessian els dentant mai pensà.
Finamira 2. liga?
Cler è la dumonda suenter la finamiras crudada pli savens las ultimas emnas. L'equipa ha mussà tge qualitads ch'ella posseda e sch'ins è a la testa da la tabella vegn er la dumonda da promoziun?
I tuna forsa tup, ma nus n'avain naginas finamiras
I na dettia betg ina finamira uffiziala da la suprastanza. Perquai giauda l'equipa actualmain il mument e na fa insumma betg squitsch a sasezza. Sch'i restian pli ditg a la testa da la tabella sa mida quai forsa.
Sch'ins dat in sguard sin tabella vesan ins ch'igl è fitg stretg a la testa. Schluein Glion ha mo in punct retard sin Poschiavo. Ils dus clubs dal Liechtensein, Triesenberg e Ruggell suondan cun quatter puncts retard.
Fatg è ch'ina eventuala promoziun en la 2. liga regiunala fiss insatge istoric per l'entira vallada. Fin oz ha Valposchiavo Calcio dumagnà pir ina giada da far il pass da la terza en la segunda liga. E per Valerio Plozza, che ha er schon dà ballape tar Cuira 97 e Domat, fissi la encurunaziun da sia carriera, sco el di.