Siglir tar il cuntegn

Header

Legenda: Impressiun dal classicher da velo Cuira-Arosa. mad
cuntegn

40 onns Cuira–Arosa Anton Zarn: «Quai è mia cursa preferida»

Il classicher da velo Cuira–Arosa festivescha quest onn il giubileum da 40 onns. Ed era dapi 40 onns s’engascha Anton «Toni» Zarn per questa cursa, dapi il 2008 sco president. E l’um da 74 onns n’ha anc ditg betg avunda. Ma la cursa Cuira–Arosa senza Anton Zarn, quai na fiss er betg da s’imaginar.

audio
Anton Zarn davart il classicher Cuira-Arosa
04:24 min, Actualitad dals 10.09.2021.
laschar ir. Durada: 04:24 minutas.

Igl è la pli veglia cursa da velo en Grischun ed è enconuschenta lunsch sur ils cunfins. La premiera ha quest classicher festivà il 1981. Sulet il 2007 n’hai dà nagina cursa, l’onn ch’il RMV Chur, il Club da velo e mountainbike Cuira, ha festivà il giubileum da 100 onns. Uschia vegni l’onn proxim tar la 40avla ediziun, puspè motiv da far festa.

Per la cursa Cuira-Arosa recumond jau d’avair trenà almain 2’000 kilometers.
Autur: Anton Zarn Anton Zarn, president RMV Chur

Da Beat Breu fin Stefan Küng

Gist ils emprims onns ha la cursa da muntogna Cuira-Arosa da bun 30 kilometers cun bunamain 1'200 meters differenza d’autezza carmalà gronds stars a la partenza, ciclists da num e da pum sco Gottfried «Godi» Schmutz, Beat Breu u Mauro Gianetti che tegna anc oz il record. Il 2017 ha plinavant Stefan Küng gudagnà questa cursa, il spezialist en la cursa cunter l’ura che vala il mument sco in dals gronds stars da velo en Svizra.

audio
Anton Zarn viva per sia passiun, il ciclissem
02:42 min, Actualitad dals 10.09.2021.
laschar ir. Durada: 02:42 minutas.

Anton Zarn: «Il ciclissem è mia vita»

Anton «Toni» Zarn è naschì a Domat e vegn ord ina famiglia da velo. Gia il bab è stà profi durant ils onns da Ferdy Kübler ch’ha tranter auter gudagnà il 1950 il Tour de France. Anton Zarn sez è er adina ì cun velo, el valeva sco spezialist da muntogna. Ma anc pli gronda carriera ha el fatg sco organisatur da cursas da velo. Zarn ha er procurà ch’il Tour de Suisse è sa fermà duas giadas a Domat, il 2002 ed il 2008.

Prendì ora gieus olimpics hai jau fatg tut. Jau hai lavurà per tschintg campiunadis mundials, per il Tour de France, il Giro d’Italia, la Vuelta e per quasi tut ils gronds classichers da velo sco Paris-Roubaix u Lüttich-Bastogne-Lüttich.
Autur: Anton Zarn president classicher da velo Cuira-Arosa

Anton Zarn viva er cun 74 onns per sia gronda passiun, il sport da velo. El presidiescha il RMV Chur sco er il classicher da velo Cuira-Arosa. En ses temp liber fa el anc adina radund 3’000 kilometers ad onn cun il velo da cursa. L’onn proxim cumpria el dentant in velo electric per uschia er pudair far vinavant grondas turas cun ses collegas, di Anton Zarn. El saja stà ina giada in bun ciclist da muntogna, ma quai temp saja passà ed ins stoppia s’adattar al temp.

Legenda: Anton Zarn sin la plazza da la staziun a Cuira, il lieu da partenza dal classicher da velo Cuira-Arosa. Andreas Wieland

RTR actualitad 12:00

Artitgels legids il pli savens

Scrollar a sanestra Scrollar a dretga