550 curriders al Transruinaulta

Las duas chavorgias Ruinaulta e Viamala èn questa fin d’emna la tribuna per passa 1’500 curridras e curriders ord l’entira Svizra e schizunt per curriders sur cunfins.

Punct las 9:15 uras è il Transruinaulta, la cursa da trail sur 42,2 kilometers da Glion fin a Tusaun, vegnida lantschada. Sco emprim è Daniel Bolt da Schiers/Aschera vegnì tarmess sin viadi, quai sut il tun da partenza dals sunatibas. Bolt era vegnì segund a las davosas duas ediziuns dal Transruinaulta e vala er quest onn sco in dals gronds favurits. Cun las cursas Transruinaulta e Transviamala terminescha Daniel Bolt questa fin d'emna sia lunga carriera da currer.

Ils emprims curriders vegnan spetgads enturn las 12:30 uras en l'arrivada a Tusaun.

Las cavorgias carmala blers curriders

Il Transruinaulta, la cursa da trail sur la distanza da maraton da 42,2 kilometers, maina la sonda da Glion fin a Tusaun. La dumengia stat lura sin il program la cursa populara Transviamala, la cursa da currer sur 19 kilometers da Tusaun fin a Donat.

Gia dus mais avant la 16avla ediziun dal Transviamala eran tut ils milli plazs da partenza davent. Quai n’è betg l’emprima giada che questa cursa en la Val Schons è vendida ora gia ditg avant. La cursa Transviamala ch’è gia vegnida onurada pliras giadas sco la pli bella cursa da currer en Svizra carmala onn per onn passa milli curridras e curriders, da la Svizra e da l’exteriur.

Transruinaulta n’è betg ina cursa per mintgin

Anc betg uschè populara è la cursa Transruinaulta ch’è naschida avant quatter onns. Questa cursa da trail che cumenza a Glion cun ina partenza d’interval n’è betg ina cursa per mintgin. Betg sulet la distanza, mabain era il profil fin a Tusaun è pretensiuns. Er per il Transruinaulta è il dumber da participants limità sin 700. Enfin oz èn radund 550 curriders s’annunziads per la cursa 2017.

Bun 200 curridras e curriders van a la partenza ad omaduas cursas e cumbattan uschia per la curuna da retg e regina da las chavorgias. Avant in onn han Ornella Poltéra da Domat e Daniel Bolt da Schiers/Aschera, pia dus matadors locals, gudagnà questa cumbinaziun.

buffet da pettas Avrir maletg en lightbox.

Legenda da maletgs: A Donat spetga sin ils participants e visitaders in grond e lartg buffet da pettas. RTR, Andreas Wieland

Er duas cursas culinaricas

Ina medaglia sco er in bun toc petta na datti dentant betg mo per ils victurs. L’organisatur, l’Uniun da sport Tumpriv, dat onn per onn gronda bregia quai che pertutga la culinarica. Betg mo ils posts a l’ur da las cursas, mabain er il buffet da pettas en l’arrivada a Donat s'auda mintgamai tar in dals puncts culminants da las duas cursas. Quellas valan er gist sco la finiziun da la stagiun da currer en il Grischun.

Partenza per la cursa dal Transruinaulta è la sonda, ils 21 d'october a las 9:15 uras a Glion. Il sajet da partenza per la cursa Transviamala è la dumengia, ils 22 d'october a partir da las 10:00 uras a Tusaun.

RR actualitad 17:30