Siglir tar il cuntegn
cuntegn

Regiunal Alessandro Giacomelli nov trenader da la USSI

Il giugadur da Cuira e Domat surpiglia il club da ballape Schluein Glion sin la proxima stagiun da Cyrille Belinga. Quai ha il club annunzià.

Alessandro Giacomelli (san.) e Vendelin Cabernard, il president da la USSI.
Legenda: Il president da la USSI, Vendelin Cabernard (dretg), beneventa il nov trenader Alessandro Giacomelli. mad / US Schluein Glion

En il ballape regiunal è Alessandro Giacomelli enconuschent dapi blers onns sco capo-tiragols da Cuira e Domat. Actualmain gioga el cun Domat en la segunda liga. El surpiglia l'equipa da terza liga sco giugadur-trenader. Igl è l'emprima giada che Giacomelli è trenader. El ha terminà dacurt ils curs da trenader da l'Associaziun svizra da ballape e sa scolescha anc vinavant cun la finamira da pudair s'engaschar sco trenader pli tard er en pli autas ligas. Sco trenaders assistents stattan Corsin Cavegn e David Caduff a disposiziun ad el.

Cyrille Belinga sa concentrescha sin ils juniors da GC

Il trenader en uffizi, Cyrille Belinga, terminescha cun quai la fin dal campiunadi current ses engaschament tar il club Schluein Glion. El aveva surpiglià l'equipa sursilvana il 2016. Trais fin quatter giadas l'emna fascheva el il viadi si da Turitg per trenar ils giugaders da Schluein Glion. A partir da la stad vegn el a surpigliar ulteriuras incumbensas en l'organisaziun dals juniors da GC.

RR novitads 06:00