Siglir tar il cuntegn
Inhalt

Regiunal Andrin Beeli al Swiss Epic 2018

Il campiunadi mundial da mountainbike a Lai ha Andrin Beeli, che parta quest onn per l’emprima giada cun l’elita da la cuppa mundiala, stuì persequitar a l’ur da la cursa. Persuenter parta il giuven mountainbiker da Sagogn ussa plain forza e motivaziun al Swiss Epic en il chantun Vallais.

Maasewerd, EGO-Promotion
Legenda: Andrin Beeli è per la terza giada a la partenza dal Swiss Epic. Andrin Beeli, mountainbiker da Sagogn

Ch’el n’haja betg pudì sa participar al campiunadi mundial da chasa haja fatg mal. El haja persuenter empruvà da sustegnair ses collegas svizzers uschè bain sco pussibel durant tut quels dis. A Lai sin in’autezza da bun 1’500 meters sur mar è Andrin Beeli lura era sa preparar per ses punct culminant, il Swiss Epic.

Il Tour de Suisse dal mountainbike

Il Swiss Epic è ina cursa sur tschintg etappas cun total 331 kilometers e bunamain 13’000 meters differenza d’autezza. La cursa cumenza sin la Bettmeralp e va a fin a Zermatt, al pe dal Matterhorn. Il spezial vi da questa cursa che vegn era numnada il Tour de Suisse dal mountainbike è ch’ins sto partir en teams da dus. Andrin Beeli ch’è gia stà duas giadas a la partenza dal Swiss Epic parta quest onn ensemen cun l’Australian Reece Tucknott. La finamira dal duo sursilvan-australian è da cuntanscher tar intginas etappas in plaz sut ils top 5.

In bun duo

Andrin Beeli e ses collega Reece Tucknott, oriund da Perth en il vest da l’Australia, èn sa preparads a moda optimala sin questa cursa extrema en las muntognas vallesanas. Reece Tucknott ha vivì ils davos trais mais tar Andrin Beeli a Sagogn. Durant ch’il giuven mountainbiker sursilvan ha emprendì da ses collega australian da discurrer meglier englais ha Reece Tucknoot emprendì d’enconuscher quasi tut ils trails en la regiun da Flem/Laax.

Il Swiss Epic cuzza dals 11 fin ils 15 da settember. Il 2019 vegn questa cursa d’etappas manada atras per l’emprima giada en il Grischun.

RR actualitad 07:00