Siglir tar il cuntegn

Header

cuntegn

Anja Furger Na planisà – gnanca siemià

Ch'Anja Furger è arrivada en la Super League e gudogna cun il FC Lucerna la cuppa svizra, avess ella gnanca ristgà da siemiar. La via tar il gieu cun la balla ha la Lumneziana chattà fitg tard. Ch'ella è là, nua ch'ella è oz, haja da far cun fitg bleras casualitads.

Cun ses 26 onns po Anja Furger da Cumbel festivar ses pli grond success sportiv. Cun las dunnas dal FC Lucerna gudogna ella il final da la Cuppa svizra da ballape. Cumenzà a dar ballape ha la Lumneziana fitg tard – cu ina collega ha dumandà sch'ella n'avess betg era tschaffen da vegnir a dar cun las dunnas da Laax.

Anja Furger è svelt stada infizada. Sia via ha continuà tar las dunnas da Schluein, lura en 2. liga tar quellas da Domat. Suenter la scola mercantila ha sia via professiunala manà ella en il chantun Berna. Era là è Anja Furger stada savens sin la plazza da ballape. Cun las Bernaisas èsi ì fin en la segund'auta liga svizra. Era sche quai era per la giuvna Lumenziana bler dapli, che quai ch'ella avess insumma ristgà da siemiar è sia via anc ida enavant.

audio
Anja Furger e sia via fin en la Super League
ord Actualitad dals 12.06.2021. Maletg: Keystone
laschar ir. Durada: 3 minutas 52 Secundas.

En in gieu d'amicizia cunter las ballapedistas da Lucerna ha ella sco i para impressiunà. Ella è vegnida envidada ad in trenament da prova tar il FC Lucerna. Era qua ha ses talent persvadì.

Dapi l'enviern 2020 dat Anja Furger ballape en la pli aulta liga svizra. Bler saja stà casualitad, ch'ella saja arrivada uschè dalunsch. Ma igl ha sper il talent era duvrà bler engaschi e surtut sustegn e motivaziun davart da sia famiglia. Quai punctuescha Anja Furger adina puspè.

video
Insta-Live cun la giugadra da ballape Anja Furger
Or da Giuventetgna dals 11.06.2021.
laschar ir. Durada: 17 minutas 15 Secundas.

RTR actualitad 07:00

Artitgels legids il pli savens