En la cursa da 19 kilometers da Tusaun fin a Donat è Arnold Aemisegger stà 1.24 minutas pli spert che Livio Bieler da Panaduz. Cunquai ha il currider da Triesenberg er gist fatg revantscha per il 2014. Avant in onn veva anc il passlungist Livio Bieler triumfà avant Arnold Aemisegger. Terz cun in retard da 1.37 minutas sin il victur è vegnì Beat Ritter ch’ha gudagnà il di avant il maraton da trail Transruinaulta.
Emma Pooley cun hattrick
Tar las dunnas ha gudagnà Emma Pooley ch’abitescha a Hausen am Albis, quai per la terza giada en seria. Pooley ha duvrà per il tschancun da Tusaun fin a Donat 1:33.55 uras. Segunda è vegnida la gronda victura dal Transruinaulta, Kathrin Götz da Bellach, terza la Glarunaisa Fabienne Stucki.
La cursa sin il tschancun pli curt, la Transviamala curta sur 11,5 kilometers, han gudagnà Sandro Michael da Ziraun tar ils umens e Fabiana Wieser da Sent tar las dunnas.
Beat Ritter resta il retg da la Ruinaulta
Beat Ritter gudogna er la segunda ediziun dal Transruinaulta, il maraton da trail da Glion fin a Tusaun. Il currider da Puntraschigna che veva gia triumfà tar la premiera il 2014 ha gudagnà la cursa da 42 kilometers e 1’800 meters differenza d’autezza en in temp da 3:21.19 uras. Cunquai è Beat Ritter stà be bun 40 secundas pli plauns che l’onn avant.
Tar la segunda ediziun dal Transruinaulta ha Beat Ritter gudagnà cun in avantatg dad 8 minutas sin Daniel Bolt da Schiers. Terz cun in retard da 12.35 minutas suonda Michael Bandli da Zizers.
Kathrin Götz ina classa per sasezza a la Transruinaulta
Tar la dunnas ha Kathrin Götz da Ballach en il chantun Soloturn triumfà. Götz ha gudagnà la cursa Transruinaulta cun in avantatg da bunamain in quart’ura sin Regula Meier da Bassersdorf. Terza è vegnida Edith Kortekaas-Amelsfoort da Versomi. Manchentà il podest per paucas secundas ha la favurita englaisa Emma Pooley.
Ritter e Götz èn ils eroxs da las chavorgias
Ils dus gronds victurs da las cursas Transruinaulta e Transviamala èn Beat Ritter e Kathrin Götz. Els dus han gudagnà la cumbinaziun da questas duas cursas. Uschia è Beat Ritter da Puntraschigna daventa il retg da las chavorgias 2015 e Kathrin Götz la regina. Omadus han triumfà suveran en il maraton da trail da Glion fin a Tusaun e terminà in di pli tard la cursa da Tusaun fin a Donat sin il podest. Tant Ritter sco era Götz en stads sur l’entira fin d’emna ina classa per sa sez.
Cursas perfetgas
Bun 550 curridras e curriders al Transruinaulta e passa 1’000 curridras e curriders al Transviamala. Gronds victurs, nagins accidents, aura perfetga ed ina culissa grondiusa. Il comité d’organisaziun è ina gia dapli satisfatg da las cursas da currer organisadas da l’Uniun da Sport Tumpriv. Els tiran danovamain ina bilantscha positiva da quai eveniment da sport ch’auda dapi onns tar in dals gronds insumma en il Grischun. La cursa da currer Transviamala è enconuschenta lunsch sur ils cunfins grischuns ed è gia vegnida onurada pliras giadas sco la pli bella cursa da currer da la Svizra.
