Siglir tar il cuntegn

Header

audio
Valposchiavo Calcio cun success en la 2. liga
Or da Actualitad dals 13.11.2023. Maletg: RTR
laschar ir. Durada: 3 minutas 51 Secundas.
cuntegn

Ballape 2. liga Valposchiavo Calcio è sin in'unda d'euforia

Dapi questa stagiun dattan ils Puschlavins ballape en la 2. liga regiunala. Entras quai ha ina tscherta euforia tschiffà il club. Valposchiavo Calcio n'ha gì naginas bregias da fitgar pe en la liga pli auta.

Anc stat in gieu sin il program per Valposchiavo Calcio quest'atun. Ma tuttina pon ins gia resumar ch'ils Puschlavins èn l'equipa da surpraisa en la 2. liga regiunala. Suenter la promoziun da la terza liga en segunda liga, han ils pli paucs spetgà che l'equipa dal sid dal chantun Grischun vegn da fitgar pe cun ils pli ferms adversaris. Il sguard sin la tabella mussa dentant che l'equipa rutinada sa senta bain en la liga pli auta. Actualmain plazza 6 da 14 equipas. En 12 gieus hai dà tschintg victorias per Valposchiavo Calcio.

Tabella 2. liga regiunala da ballape

Avrir la box Serrar la box

Link tar Federaziun da ballape

Fatg è dentant era che la 2. liga regiunala è ina liga fitg guliva. Uschia è l'avantatg sin il stritg mo quatter puncts. Proxima sonda sto Valposchiavo dentant anc prender suenter in gieu ch'èra vegnì spustà. Là han els puspè la schanza d'engrondir l'avantatg sin il stritg.

Gronda rutina e bun spiert d'equipa

audio
In'euforia per il ballape en il Puschlav
ord Actualitad dals 13.11.2023. Maletg: RTR
laschar ir. Durada: 4 minutas 17 Secundas.

Motivs per questa paraula puschlavina pon ins chattar in zic dapertut. Segirafranc è l'equipa fitg rutinada cun plirs giugaders sco Nicolo Pola (32), Valerio Plozza (35) Massimiliano Fiorina (32) u Mattia Merlo (33) che han gia dà tar autras equipas sin quest nivel u perfin anc pli aut. Ina fitg gronda rolla gioga dentant er il spert d'equipa. Fitg blers giugaders èn durant l'emna a Cuira u insanua en la Bassa. E tuttina fan els il sforz d'adina puspè turnar enavos en la vallada. In exempel il goli Lorenzo Tuena (21) che studegia a Turitg e che di che Valposchiavo Calcio saja tut per el.

Dar ballape cun Valposchiavo Calcio è dapli ch'in hobi. Igl è passiun.
Autur: Lorenzo Tuena Goli

Per blers giugaders che n'èn betg pli da chasa en la val, è il club da ballape ina pussaivladad da tuttina restar en contact cun il Puschlav. En il club da Valposchiavo Calcio chattan ins pliras persunas che vivan per il club. Tranter quels tutga er il president Renato Cirolo, ch'è dapi il 2017 al timun dal club. Part da la famiglia da Valposchiavo Calcio saja el dentant gia dapi var 50 onns. El saja stà giugader, trenader da pliras equipas ed uss president.

Per mai è Valposchiavo Calcio mia segunda famiglia
Autur: Renato Cirolo president
Renato Cirolo è dapi il 2017 president da Valposchiavo Calcio
Legenda: Renato Cirolo è dapi il 2017 president da Valposchiavo Calcio. RTR

Per il president èsi cler: I saja da giudair il mument. Actualmain saja in spezial temp per il club e quai percorschian ins era en l'entira val. Adina dapli fans visitan ils gieus ed er en ils vitgs da la Val Puschlav vegni discurrì dapli davart Valposchiavo Calcio, raquinta Renato Cirolo. Ins sappia propi di ch'i regia ina tscherta euforia. Plinavant sajan tar ils gieus ordaifer era fitg savens «Puschlavins dal cor» da la partida a guardar ils gieus.

Ch'ils temps vegnan a sa midar, baud u tard, è dentant cler per tut las persunas ch'èn colliadas cun il club. Sur pli lung temp vegni grev da tegnair l'equipa en 2. liga. Blers giugaders da tschep èn gia sur 30 onns ed igl è da quintar che quels chalan bainbaud cun il dar ballape. Ma, apunta: Ils Puschlavins giaudan il mument.

RTR actualitad 07:00

Artitgels legids il pli savens