Siglir tar il cuntegn

Header

Legenda: Al CB Trun/Rabius manca anc in sulet punct per restar en 3. liga. Andreas Wieland
cuntegn

Ballape regiunal 3. liga Trun/Rabius ha las cartas en ils agens mauns

Sin il Club da ballape Trun/Rabius spetga il pli impurtant gieu da la stagiun. En il davos gieu da campiunadi ordaifer encunter Gams vai per tut ni nagut. Ils dus clubs cumbattan per restar en la terza liga.

I spetga in gieu chapital, tant per il CB Trun/Rabius sco era per Gams. Ils Sursilvans fan dentant il viadi en la Bassa cun in bun sentiment. Suenter il 6:3 en il davos gieu a chasa encunter Sargans ha Trun/Rabius tancà morala e motivaziun per questa finalissima. E grazia a quella victoria encunter Sargans ha il CB Trun/Rabius er in avantatg da dus puncts sin Gams ch’è uschia crudà sin ina plazza da relegaziun.

audio
Trun/Rabius avant gieu capital
02:28 min, Sport ed actualitad dals 29.06.2021.
laschar ir. Durada: 02:28 minutas.

Il quint è pia fitg simpel. L’equipa che gudogna resta en 3. liga, l’equipa che perda sto far il pass en 4. liga. Al CB Trun/Rabius tanscha dentant er in pari per tegnair la liga.

Er per Domat vai per bler

Il gieu tranter Gams e Trun/Rabius cumenza la sonda, ils 3 da fanadur, a las 16:00 uras. A las medemas uras vegni er tar il derbi tranter Cuira 97 ed il Club da ballape da Domat. Domat sto gudagnar per salvar la schanza da far il pass en la 2. liga. Avant il davos gieu da la stagiun è Domat sin il segund plaz da la tabella, in punct davos Bogn Ragaz che dat il davos gieu ordaifer encunter Buchs, il quart da la tabella.

RTR Actualitad

Artitgels legids il pli savens

Scrollar a sanestra Scrollar a dretga