Ballape regiunal - CB Lumnezia e Schluein Glion van ina via communabla
Ils dus clubs vischins la US Schluein Glion ed il CB Lumnezia s'avischinan, e quai davent dad immediat. Suenter che Trun/Rabius e Danis-Tavanasa han decis avant trais onns da cooperar, è quai gia la segunda gronda collavuraziun en il ballape sursilvan.
A partir da la stagiun 2023/2024 lavuran ils dus clubs da ballape da Schluein Glion ed Lumnezia ensemen. Las duas equipas èn sur onns stadas rivalas, ma fan uss chaussa communabla e furman ina gruppaziun.
Differenza fusiun e gruppaziun
Avrir la boxSerrar la box
Ina gruppaziun n'è betg il medem sco ina fusiun. Ina gruppaziun munta che las duas uniuns lavuran bain pli stretg ensemen, ellas restan dentant uniuns per sasezzas.
Omaduas uniuns salvan per exempel la suprastanza sco fin qua, ed er las equipas. Ina gruppaziun simplifitgescha dentant la collavuraziun tranter las differentas equipas dals clubs. Uschia po in giugader da Lumnezia dar ballape cun Schluein Glion senza stuair far in transfer. Il medem vala er viceversa.
Uschia van els la medema via sco gia avant trais onns il CB Trun/Rabius e la US Danis-Tavanasa. Er las duas equipas da la Cadi èn stadas sur onns rivalas, ma han pervia da stretgas da giugaders e per rinforzar las equipas decis da collavurar.