2. liga interregiunala:
La meglra equipa grischuna Cuira 97 ha festivà ordaifer a Bazenheid la segunda victoria en roda. Encunter l'equipa dal chantun Son Gagl han els gudagnà cun 2:1 grazia a gols da Mitko Gjorgjievski e Mate Coric.
En la tabella sa chatta Cuira 97 uschia da nov sin plazza 6 da la tabella. L'avantatg sin il stritg è dentant mo tschintg puncts.
2. liga regiunala
Valposchiavo Calcio fa vinavant buna reclama per il ballape grischun en la 2. liga regiunala. Ordaifer encunter il FC Herisau giogan ils Puschlavins pari 1:1. Il sulet gol è vegnì sajettà da Nicolo Pola. En la tabella è Valposchiavo Calcio da chattar sin plazza 6 cun 14 puncts ord ils emprims nov gieus.
L'equipa promovida ha uschia mussà fin uss ch'els vegnan da tegnair pitg a tuttas equipas en la liga pli auta. Quai n'era betg stà da spetgar uschia.
3. liga regiunala
Ina trumpada hai dà per la US Schluein Glion. Encunter il FC Mels perda l'equipa da la Foppa cun 1:3. En la tabella èn els bain vinavant sin plazza dus, il retard sin il leader da Schaan è dentant gia 8 puncts.
Ina impurtanta victoria hai perencunter dà per la segunda equipa sursilvana en 3. liga, Trun/Rabius. En in gieu da spitachel gudogna l'equipa da la Cadi cun 4:3 encunter Domat. Il gol decisiv è pir crudà en la 93avla minuta entras in penalti da Livio Janka.
Trun/Rabius è bain da chattar vinavant sut il stritg da la tabella. Quai dentant cun medem blers puncts sco Flums ch'è sin l'ultim plaz da la tabella e Triesen ch'è gist sur il stritg.