En la segunda liga regiunala ha il Club da ballape da Domat stuì magunar l'emprima terrada en questa stagiun. Suenter la victoria da 2:0 encunter il FC Abtwil-Engelburg ha Domat pers l'emprim gieu da chasa encunter il FC Buchs cun 0:4.
Cumenzà bain il campiunadi en la segunda liga regiunala ha perencunter Valposchiavo Calcio ch'ha fatg la primavaira il pass da terza en segunda liga. L'equipa puschlavina ha battì Mels ordaifer cun 3:1. L'emprim gieu aveva Valposchiavo Calcio gudagnà a chasa encunter Vaduz cun 2:1.
Festival da gols per las equipas sursilvanas da 3. liga
En ils gieus da las duas equipas sursilvanas da terza liga hai dà gols tut a dubel. Il CB Trun/Rabius perda stgars cun 2:3 ordaifer cunter il FC Sargans, quai suenter che l'equipa da la Cadi manava anc 10 minutas avant la fin dal gieu cun 2:1. Gist 10 gols hai dà en il duel tranter Triesen e l'US Schluein Glion. La finala ha l'equipa da la Foppa battì l'equipa dal Principadi dal Liechtenstein ordaifer cun 6:4.
En la segunda liga interregiunala gudogna Cuira 97 1 ordaifer encunter il FC Tägerwilen 1 cun 2:1.