Siglir tar il cuntegn
Inhalt

Regiunal Ballape regiunal: Schluein-Glion e Domat cumenzan la stagiun

Per bleras equipas da ballape regiunalas grischunas cumenza la fin d'emna da Pasca la stagiun. Tranter auter era per ils ballapedists da Schluein-Glion e per Domat. Las finamiras: vegnir e restar en la segunda liga.

Giugaders da ballape.
Legenda: La US Glion-Schluein vul sa plazzar sisum la tabella. MAD

L'US Schluein-Glion gioga questa stagiun en la terza liga. L'equipa tutga tar ils favurits en la terza liga. Els giogan in ballape plitost offensiv. Quai na saja betg adina simpel, cunquai che bleras equipas dattan fitg defensiv. La situaziun saja dentant sco ch'ella saja ed ins stoppia betg sa vilentar, mabain stoppian ins empruvar da nizzegiar las atgnas fermezzas e far igl meglier ord la situaziun, manegia il trenader assistent David Caduff. Cunzunt per ils giugaders giuvens che na sajan anc betg disads da dar schi offensiv, vegnia la situaziun a l'entschatta forsa ad esser ina sfida. Quai saja dentant mo ina dumonda dal temp.

Vegnir sin l'emprim plaz

La finamira da questa primavaira saja clera: surpassar il club da ballape Tusaun-Cazas ed esser a la testa da la tabella. Quai muntass lura er l'avanzament en la segunda liga. Sche l'equipa saja propi pronta per quest pass, vegnia a sa mussar, manegia David Caduff.

Distanza da puncts

Per il mument è il FC Tusaun-Cazas per 3 puncts davant il US Schluein-Glion.

Domat vul restar en la segunda liga

Il club da ballape Domat gioga questa stagiun en la segunda liga. Ins sappia dentant ch'i na saja betg simpel da tegnair pitg en quella. Tuttina è il trenader dal club da Domat, Walter Frizzoni optimistic. Las premissas sajan numnadamain dadas ed ins haja in fitg bun cader, in cader che haja la qualitad da dar en la segunda liga.

RR sportissimo 17:00