Segunda liga interregiunala
Il club da ballape da Cuira ha giugà in pari 1:1 cunter Lachen/Altendorf. Sajettà il gol per Cuira ha Resandan Yogarajah en la 70avla minuta. Uschia èn ils da Cuira sin rang 7 da la tabella.
Terza liga
L'US Schluein Glion ha stuì laschar plimas la sonda saira cunter la segunda equipa da Cuira 97. A chasa han ils Sursilvans pers cun 1:4.
Trun Rabius ha confirmà la buna furma dals ultims gieus, la squadra da la Cadi ha gudagnà cunter il FC Triesen a chasa cun 2:1.
Segunda liga regiunala
En il gieu a chasa è il CB Domat/Ems fruntà la mesemna saira sin il FC Vaduz 2. A naginas da las duas equipas n'èsi gartegià da sajettar in gol, uschia ch'il gieu ha finì 0:0. Meglier èsi ì per la squadra grischuna la dumengia. Ella ha gudagnà ordaifer cunter il FC Montlingen cun 1:0.
Tut en tut n'ha Domat dentant betg chattà enavos tar la furma da la stagiun passada. Entant ch'els han finì lura sin la terza plazza, sa chattan els ussa cun be 13 puncts sin la 10 avla plazza da la tabella.
Ils ballapedists da Valposchiavo Calcio giogan vinavant sco ch'els fissan gia pli ditg en la segunda liga regiunala. Valposchiavo ha dumengia battì il FC Wittenbach cun 2:0 ed è suenter questa victoria sin plaz quatter da la tabella.