2. liga interregiunala
Nagins gols, dentant in punct per Cuira 97. L'equipa da la chapitala grischuna ha giugà pari 0:0 encunter il segund da la tabella, il FC Widnau. En la tabella sa chattan ils da Cuira suenter la terza runda da primavaira sin il 10avel plaz.
2. liga regiunala
Il Club da ballape da Domat s'avischina a la testa da la tabella. Grazia al 3:2 a chasa encunter il FC Mels han ils da Domat sco terzs da la tabella be pli in disavantatg da dus puncts sin il leader, il FC Vaduz ch'ha dentant dà in gieu pli pauc. En il proxim gieu frunta Domat ordaifer sin Uzwil che sa chatta be sur il stritg da la tabella.
3. liga regiunala
L'US Schluein Glion cumenza la runda da primavaira cun in gieu da gala. Ils Sursilvans han declassà ordaifer il FC Triesen gist cun 6:2. L'USSI ha gia cumenzà fitg bain il gieu e sajettà dus gols en las emprimas quatter minutas. Paucas minutas avant la fin manava Schluein Glion cun 6:0 cura ch'ils da Triesen han anc pudì sajettar dus gols.
In impurtant punct hai er dà per il CB Trun/Rabius cunter il cumbat da relegaziun. L'equipa da la Cadi ha giugà ordaifer encunter il FC Triesenberg pari 1:1. Il gol da Triesenberg è gia crudà en la 5avla minuta. Pir en la segunda minuta dal temp supplementar ha Trun/Rabius pudì egualisar entras in penalti da Livio Janka.
Demai che Valposchiavo Calcio ha pers a Schaan cun 4:7 ha l'US Schluein Glion pudì far il sigl a la testa da la tabella. Uss han ils Sursilvans cun 29 puncts tuttina blers puncts sco Valposchiavo Calcio. Trun/Rabius sa chatta sin il 9avel plaz da la tabella cun 11 puncts ed uschia cun ina reserva da 8 puncts sin la plazza da relegaziun.