Valposchiavo Calcio ha pers sonda suentermezdi il gieu da chasa encunter Winkeln SG cun 0:1. En in gieu guliv han ils Songagliais sajettà il sulet gol da la partida curt avant pausa. Valposchiavo Calcio ha spezialmain suenter pausa gì pliras schanzas d'egualisar. Tranter auter han els tutgà en la 94avla minuta cun in sajet da distanza la latta.
Ils Puschlavins, ch'èn l'emprima stagiun en la 2. liga èn uss sin plaz 6 da la tabella. Els han anc da dar in gieu ils 25 da november, encunter il FC Montlingen.
A fin va la runda d'atun per il FC Domat, che perda il davos gieu da questa runda cun 1:2 encunter il FC Au-Berneck 05. Tut ils gols èn stads en la segunda mesadad dal gieu.
Cuira 97 – FC Frauenfeld 2:2
En la segunda liga interregiunala ha Cuira 97 dà ordaifer encunter il FC Frauenfeld. Il gieu è ì a fin pari cun 2:2. Cuira ha sajettà l'emprim gol en la 15avla minuta. Silsuenter ha dentant il FC Frauenfeld surpiglia il timun ed ha vulvì il gieu cun gols en la 36avla e 71avla minuta. Quasi en il davos mument – en la 93avla minuta – ha Cuira anc sajettà in gol.
1/4 final prerunda da la Cuppa Svizra
L'US Schluein Glion è, suenter ch'il campiunadi è ì a fin avant in’emna, anc stà en acziun en il quartfinal da la prerunda da la Cuppa Svizra. Encunter il FC Rüti (GL) da la 5avla liga han ils Sursilvans gudagnà cun 6:1.
La prerunda da la cuppa svizra è in turnier nua ch’il victur dastga sa participar il proxim onn a la runda principala da la Cuppa svizra. La fissi lura er pussaivel da dar encunter YB, Turitg u Son Gagl.