Ils novizs en la 2. liga regiunala Valposchiavo Calcio pon era tegnair encunter al CB Domat, ch'ha gì ina fitg buna stagiun l'onn passà. A Domat na va nagin cun la victoria, i dat in pari 1:1. Domat ha bain pudì ir en avantatg en la 16avla minuta, ma anc avant la pausa ha Valposchiavo pudì egualisar.
Er sch'ins avess pudì spetgar dapli da Domat questa stagiun tanscha quest punct per puspè vegnir sur il stritg en la tabella. Dentant é ils 10avel plaz en la tabella segir ina trumpada. Valposchiavo po cun ses punct dad oz rinforzar la posiziun sin plazza 5 da la tabella. Ina buna prestaziun per l'emprima stagiun en ina pli auta liga.
2. liga interregiunala
La sonda ha Cuira 97 giugà a chasa en segunda liga interregiunala cunter Adliswil cun 1:0. Gia l'emprima mesadad ha Cuira dominà il gieu e gì passa dubel uschè bleras schanzas da sajettar in gol. Ma funcziunà n'hai betg.
En la segunda mesadad hai lura dà ina carta melna-cotschna per Adliswil. Cun in um dapli sin il plaz ha Cuira 97 lura finalmain gartegià il gol. En la 75avla minuta ha Joel Hobi dà in culp da chau ed uschia sajettà Cuira en avantatg. Il gieu è anc ina giada vegnì intensiv cun bleras midadas ed inqual carta melna encunter la fin, ma il resultat è restà tar il resultat final da 1:0.