Siglir tar il cuntegn

Header

audio
Saira: Cuira 97 e la victoria da 17:1 – co è quai pussibel?
Or da Actualitad dals 12.08.2019.
laschar ir. Durada: 02:36 minutas.
cuntegn

Ballape regiunal 17:1 – Cuira 97 declassescha Turitg United

Igl è in resultat ch’ins na vesa betg savens en il sport da ballape. Cun ina differenza da 16 gols han ils da Cuira battì l’equipa da Turitg, che giugava l’onn passà anc en l’emprima liga.

Gia avant la partida hajan els sentì, che l’adversari na saja betg propi pront per la partida, di il chapitani da Cuira 97 Carlo Bearth. Ils giugaders sajan vegnids fitg tard sin il plaz per sa preparar sin il gieu. E sin il pli tard suenter ils emprims 2-3 gols saja stà cler che quest adversari na vegnia betg a tener pitg:

Questa equipa aveva in nivel da quarta liga, sche insumma.
Autur: Carlo Bearthchapitani emprima equipa Cuira 97

Gronda part da l’equipa en vacanzas

Il motiv che l’equipa da Turitg United era uschè flaivla è para che 8 dals giugaders sajan anc en vacanzas e turnian pir quest’emna. Plinavant haja blers giugaders bandunà il club cura che l’equipa è crudada da l’emprima liga en la segunda liga interregiunala.

Per Cuira 97 èsi stà ina fitg buna partenza en la stagiun. Grazia a la clera victoria è Cuira il mument sin l’emprim rang da la tabella cun ina differenza da gols da plus 16. Decisiv per la tabella, sche pliras equipas han tuttina blers puncts, èn en questa liga dentant betg ils gols mabain ils puncts da chasti.

RR actualitad 17:45