Siglir tar il cuntegn

Header

Carlo Bearth, Rafael Deplazes, Lars Caduff, Marino Cavegn e Fabrizio Cavegn.
Legenda: Ils tschintg Sursilvans da Cuira 97 Carlo Bearth, Rafael Deplazes, Lars Caduff, Marino Cavegn e Fabrizio Cavegn. RTR, GIAN CARLO CANDINAS
cuntegn

2. liga interregiunala Cuira 97 en mauns sursilvans

Cun blera forza sursilvana emprova Cuira 97 da far furora questa stagiun en 2. liga interregiunala. Sper Carlo Bearth e Rafael Deplazes che tutgan gia dapi plirs onns tar il tschep da l'equipa, fan da nov er Lars Caduff, Fabrizio Cavegn e Marino Cavegn part da la meglra equipa da ballape grischuna.

  • Carlo Bearth è il vegl giugader da la delegaziun rumantscha tar Cuira 97. Il chapitani da 30 onns è dapi il 2016 part da l'equipa ed in dals routiniers. Il giugader da Rabius è in giugader engraziaivel per l'equipa, cunquai ch'el sa quasi dar sin mintga posiziun. Il pli savens dat el sco defensur da la vart.

  • Dapi dus onns è Rafael Deplazes (22) part da l'emprima equipa da Cuira 97. Il giuven da Mustér ha mussà spezialmain l'ultima stagiun ses sang fraid avant il gol. En 12 gieus ha el sajettà 10 gols. Cun sia spertezza è el in giugader che vegn da metter sut squitsch mintga defensiun.

  • Fabrizio Cavegn (18) è il giuven da la delegaziun sursilvana. Il giuven da Vella ha fatg il pass davent dal Team Südostschweiz (U18) tar l'emprima equipa da Cuira. Il giugader offensiv sa dar en l'offensiva in zic en tuttas posiziuns.

  • Il frar da Fabrizio Cavegn è Marino Cavegn (19). La stagiun passada è el anc stà en acziun per la US Schluein Glion en la 2. liga regiunala. Sco ses frar è era el in giugader offensiv ch'è bun da dar là en tuttas posiziuns.

  • Il tschintgavel Sursilvan è Lars Caduff (20) da Falera. L'onn passà è l'attatgader stà il capo-tiragols da Schluein Glion. En 11 gieus ha el sajettà 11 gols. El di che sia finamira saja adina da far 1 gol per gieu.

Las finamiras restan autas en la chapitala

Puspè ina giada hai dà bleras midadas tar Cuira 97 avant la stagiun. Sco il trenader Maximilian Knuth di, sajan 13 giugaders vegnids vitiers, nov giugaders hajan bandunà l'equipa. Ins na possia er betg cumparegliar pli il cader cun l'onn passà. L'equipa saja fitg giuvna dentant saja la qualitad er quest onn fitg auta, precisescha Maximilian Knuth.

Ils giugaders giuvens dattan gas ed ensemen cun ils giugaders in zic pli rutinads savess quai vegnir fitg bun.
Autur: Maximilian Knuthtrenader Cuira 97
Purtret Maximilian Knuth
Legenda: Il Tudestg Maximilian Knuth è dapi l'entschatta 2019 trenader da Cuira 97. RTR, GIAN CARLO CANDINAS

Il trenader tudestg sa bain che las finamiras èn autas en la chapitala grischuna. La stagiun passada era Cuira 97 sin buna via en 1. liga, fin ch'il coronavirus ha franà l'equipa. Ins veglia natiralmain puspè dar davanttiers. La concurrenza saja dentant fitg gronda en la 2. liga interregiunala. Perquai na vul el anc betg discurrer da memia dad ina promoziun en 1. liga.

Entschatta campiunadi

Cuira 97 entschaiva il campiunadi sonda a chasa cunter Widnau. Il gieu a la Ringstrasse cumenza a las 16.00.

RTR actualitad 17:00

Artitgels legids il pli savens

Scrollar a sanestra Scrollar a dretga