Siglir tar il cuntegn

Header

Ina scena d'in gieu da ballape.
Legenda: Vul Schluein Glion restar en 2. liga regiunala, sto l'equipa spezialmain ir per puncts a chasa a Crap Gries. MAD US Schluein Glion
cuntegn

2. liga regiunala La USSI spetga ina greva stagiun en 2. liga

L'uniun sportiva Schluein Glion stat avant ina stagiun in zic intscherta. Suenter bleras midadas en il cader dastgan ins esser spanegià sche l'equipa vegn da tegnair pitg en la 2. liga regiunala.

Quai n'èn betg stads simpels mais per la US Schluein Glion. Malgrà ch'i n'è betg vegnì dà ballape a Crap Gries pervi da corona, è tuttina marschà pulit bler tar il club da la Foppa. Blers giugaders da tschep, sco il capo-tiragols Lars Caduff u Marino Cavegn, han bandunà il club. Omadus han midà tar Cuira 97.

Er ils giugaders da la Tschechia Patrick Gilian e Miroslav Routek èn ids davent. Uschia è il schef da sport, David Caduff stà confruntà l'ultim temp cun la sfida, da metter sin pais in'equipa ch'è buna avunda da tegnair pitg en la 2. liga regiunala durant la proxima stagiun.

L'equipa che va en il cumbat per tegnair la 2. liga saja fitg giuvna, di David Caduff. I saja dentant er ina equipa cun bler potenzial. Els hajan recrutà intgins juniors che devan l'ultima stagiun anc tar ils juniors B en la Coca Cola League. Plinavant han giugaders da la segunda equipa da Schluein Glion fatg il pass tar els, e grazia al nov trenader Mate Lekishvili hajan els era pudì engaschar trais giugaders da Cuira. Lekishvili ch'è dapi il zercladur il scheftrenader, trenava avant la segund'equipa da Cuira en 3. liga. Las ultimas emnas ha el laschà giugar in zic ses contacts.

La stagiun vegn ina sfida

Il schef da sport è pertschert ch'i spetga ina greva stagiun sin la giuvna equipa da Schluein Glion, ch'è en media mo insatge pauc sur 20 onns veglia. El spetga dentant ch'ils giugaders rutinads sco Luca Vinzens, Tiziano Vinzens, Serafin Bundi u Luzi Dermont tiran il char, er en fasas pli grevas.

Nus vesain ils proxims mais, sche quest'equipa è madira per la 2. liga regiunala.
Autur: David Caduffschef da sport

David Caduff na vul betg far squitsch. I saja impurtant da dar peda, spezialmain als giuvens che fan da nov part da l'equipa. Cun la ristga, ch'i na tanschia forsa betg da tegnair la liga. Tuttina è il schef da sport optimistic per la nova stagiun, il potenzial dal cader saja fitg grond, manegia Caduff.

Entschatta campiunadi

Per la US Schluein Glion cumenza la stagiun 2020/2021 gia il venderdi saira. Ordaifer dattan ils Sursilvans cunter Romanshorn. Il gieu cumenza a las 20.00. L'emprim gieu da chasa ha lieu sonda, ils 29-08-2020.

RTR actualitad 12:00

Artitgels legids il pli savens

Scrollar a sanestra Scrollar a dretga