Siglir tar il cuntegn

Header

cuntegn

Ballape: 2. liga regiunala Sto l’USSI puspè ir a la chatscha d’in nov trenader?

Sco i para sto l’emprima equipa da l’Uniun Sportiva Schluein Glion tschertgar in nov cautrenader en vista a la proxima stagiun 2020/2021.

Tenor plirs giugaders ed enconuschents dal ballape en Surselva vegnia Corsin Cavegn a sa retrair sco trenader da l’USSI, la meglra equipa sursilvana che dat en la segunda liga regiunala.

Il president da l’uniun, Vendelin Cabernard, n’ha sin dumonda da RTR dentant betg vulì confermar la demissiun da Corsin Cavegn che aveva surpiglià la batgetta pir curt avant Nadal suenter ch’il schef-trenader, Alessandro Giacomelli, era sa retratg surprendentamain la fin da november.

Gia lura aveva l’Uniun Sportiva Schluein Glion communitgà che Corsin Cavegn daventia il nov um a la lingia ina giada enfin la fin da la stagiun. Pervia da la crisa da corona è quella vegnida annullada, uschia che Cavegn n’ha trenà l’equipa durant gnanc in gieu da campiunadi.

Durant ils davos mais ha Corsin Cavegn survegnì sustegn da Gabriel Derungs sco trenader assistent e da Damian Arpagaus sco trenader dals golis.

Plirs giugaders midan tar Cuira 97

Definitiv è che plirs giugaders bandunan l’Uniun Sportiva Schluein Glion. Quai ha er il president Vendelin Cabernard confermà. Tranter auter sa tracti da Marino Cavegn, il figl da Corsin Cavegn – quai che pudess era esser ina raschun da dar giu il post da cautrenader. Er vegn Lars Caduff a midar da Schluein a Cuira. Plinavant mida er Fabrizio Cavegn, l’auter figl da Corsin Cavegn, che dat il mument tar il Team Südostschweiz U18 tar Cuira 97.

RTR Sportissimo 17:00

Artitgels legids il pli savens