Siglir tar il cuntegn

Header

cuntegn

Ballape regiunal Cuira 97 n'è betg stà da frenar quest atun

La meglra equipa da ballape grischuna ha recaltgà en 13 gieus 30 puncts quest atun e va sco leader da la 2. liga interregiunala en la pausa d'enviern. L'avantatg sin il segund da la tabella è sis puncts. Avant la stagiun quasi nagin che avess cartì vidlonder.

Igl è ina totalmain nova situaziun per Cuira 97. Las duas ultimas stagiuns en la 2. liga interregiunala ha l'equipa grischuna stuì cumbatter cunter la relegaziun. E piz a cup è la relegaziun mintgamai vegnida evitada. Perquai hai dà sin la nova stagiun ina pulita restructuraziun en il cader. Plirs giugaders han bandunà il club, gist sis giugaders novs hai dà. Er giugaders che han giugà ils ultims onns en ligas pli autas. Quai hajan ins sentì durant quest'atun, di il chapitani Carlo Bearth (29).

La qualitad da l'equipa è simplamain pli auta ch'ils ultims onns.
Autur: Carlo Bearth chapitani da Cuira 97

Carlo Bearth

Avrir la box Serrar la box

Il Sursilvan dat dapi il cumenzament dal 2016 ballape tar Cuira 97. Avant è el stà activ plirs onns tar la US Schluein Glion sco capo-tiragols. Tar Cuira ha Carlo Bearth il cumenzament er giugà sco attatgader. Ils ultims onns è el dentant pli e pli fitg vegnì in allrounder, uschia ha il giugader da 29 onns giugà quest'atun spezialmain sco defensur sin la vart dretga.

La finamira avant la stagiun 2019/2020 era clera tar il club: Giugar davanttiers ed esser lunsch davent da la relegaziun. Ch'els èn uss da chattar a la testa dal campiunadi suenter la runda d'atun, n'avessan ni il president ni ils giugaders mai siemià.

1. liga uss in stuair?

Malgrà che Cuira maina actualmain en la tabella cun 6 puncts avantatg sin Seuzach, na vul l'equipa da la chapitala grischuna betg metter sut squitsch sasezza.

Da ordvart audian ins gia las vuschs che din, ch'els stoppian uss far il pass en 1. liga, di il president Josef Müller. Uschè simpel n'èsi tenor el dentant betg. Ina promoziun fetschia mo senn, sch'ins vegnia da metter en pe in'equipa che vegnia da tegnair questa liga. Perquai èsi tenor il president impurtant da discussiunar intern las proximas emnas davart quest tema.

Suenter 6 onns vegn Josef Müller a dar giu proxima stad la batgetta sco president da Cuira 97. E cler ch'el siemia d'ina derniera perfetga cun la promoziun en 1. liga. La davosa giada che l'equipa grischuna ha dà en questa liga è stà la stagiun 2013/2014.

Structura da ligas en il ballape svizzer

Avrir la box Serrar la box

En Svizra datti nov ligas da ballape:

  • Super League
  • Challenge League
  • Promotion League
  • 1. liga
  • 2. liga interregiunala
  • 2. liga regiunala
  • 3. liga
  • 4. liga
  • 5. liga

RR actualitad 17:00

Artitgels legids il pli savens