Siglir tar il cuntegn

Header

Giugaders da Cuira 97 en acziun
Legenda: Stagiun d'atun per il gat? L'annulaziun da la stagiun fagess mal a l'equipa da Cuira 97. MAD Cuira 97
cuntegn

ballape regiunal Frust tar Cuira 97

Da la 2. liga interregiunala fin la 5avla liga na vegn fitg probabel betg giugà ballape fin la stad. Quai han las federaziuns da ballape regiunalas decis la sonda. Cuira 97 n'ha betg chapientscha per questa decisiun.

La sonda han ils 13 presidents da las federaziuns da ballape regiunalas en Svizra fatg la dumonda d'annullar la stagiun da ballape 2019/2020. Quai pervia dal coronavirus. I duess dar naginas relegaziuns e naginas promoziuns d'equipas. En il decurs da quest'emna vegn la federaziun svizra da ballape a decider definitiv en chaussa.

Grev d'acceptar per Cuira 97

Spezialmain dir sche la stagiun vegn annullada èsi per la meglra equipa grischuna, Cuira 97. Suenter l'atun en 2. liga interregiunala era l'equipa da la chapitala a la testa da la tabella cun in avantatg da sis puncts sin il segund. Cuira era sin buna via da far, suenter sis onns abstinenza, il pass enavos en 1. liga.

Giugaders da ballape da Cuira en acziun
Legenda: Fin la stad na datti fitg probabel betg pli da vesair ballape a la Ringstrasse a Cuira. MAD FC Seuzach

Il president da Cuira 97, Josef Müller n'ha betg chapientscha che la stagiun vegn simplamain annullada, pia che l'entira runda d'atun n'ha nagina valita pli. Tenor el dastgia en uschè ina situaziun extraordinaria cun il coronavirus mo dar victurs. La meglra varianta tenor el: «I dat ina promoziun per l'equipa a la testa da la tabella, i na dat dentant nagina relegaziun per las equipas a la cua». Quai davent da la 2. liga interregiunala fin tar la 5avla liga.

Pervia d'in virus na dastgi betg dar perdiders.
Autur: Josef Müllerpresident Cuira 97

Cuira 97 vegn ad esser in dals perdiders sche la federaziun da ballape svizra approvescha la dumonda da las federaziuns da ballape regiunalas. Josef Müller ha mo ina pitschna speranza ch'i dettia anc ina midada.

RTR actualitad 17:00