Siglir tar il cuntegn

Header

cuntegn

ballape regiunal Ils plazs da ballape èn vids

L'entir mund da ballape stat airi. Davent da la Champions League fin en 5avla liga. Er per ils giugaders che dattan ballape sco hobi èsi actualmain in grev temp.

Igl è ina situaziun nunusitada per tut ils amaturs da ballape. Ina situaziun che nagin enconuscheva fin ch'il coronavirus ha franà il mund ed uschia er il mund da ballape. Il mars u entschatta avrigl è adina il temp cura ch'ils campiunadis da ballape regiunal cumenzan.

Tge far durant quest temp senza trenament e gieus?

Actualmain datti pli impurtantas chaussas ch'il ballape, di Livio Janka dal CB Trun/Rabius (3. liga). Ma, i saja natiralmain donn che la stagiun da ballape dettia en l'aua.

Ins ha investì bler temp durant l'enviern e fiss stà motivà da dar campiunadi.
Autur: Livio JankaCB Trun/Rabius

Serafin Bundi che dat ballape tar la US Schluein Glion en 2. liga regiunala na ha betg pli grondas speranzas ch'i vegn dà ballape questa primavaira. Perquai na trenescha el er buc grondas actualmain.

Jau trenesch in zic forza e stabilisaziun. Ma jeu na manegel betg che nus dain anc bal questa stagiun.
Autur: Serafin BundiUS Schluein Glion

Fabrizio Cavegn, giugader tar il «Team Südostschweiz» sut 18 onns ha in cler plan da trenament durant quest temp nunusità. Il giuven da Vella ha la finamira da far in di il pass tar ils profis.

Jau trenesch a chasa forza, mon a currer, cun velo u ch'jau mon a dar bal cun mes frar.
Autur: Fabrizio CavegnTeam Südostschweiz U18
Fabrizio Cavegn vid dar ballape
Legenda: Fabrizio Cavegn ha mess sin in plan da trenament per restar en furma. MAD Fabrizio Cavegn

Actualmain datti pli impurtantas chaussas ch'il sport da ballape. Quai è conscient als trais giugaders passiunads. Tuttina speran els natiralmain che la situaziun cun il coronvirus sa calma puspè e ch'ins possia bainspert puspè ir suenter al grond hobi.

RTR Sportissimo