Siglir tar il cuntegn

Header

Giugaders da ballape en lur tricots
Legenda: L'emprima equipa da Danis-Tavanasa Ils giugaders da Danis-Tavanasa che dattan en 4. liga UsDT
cuntegn

Ballape regiunal L'US Danis-Tavanasa vul collavurar cun auters clubs

A lunga vista na vegn il club da ballape da Danis-Tavanasa betg da tegnair duas equipas. Surtut il cader da giugaders en quarta liga è magher. L'ultim gieu da la runda d'atun han ins perfin dà forfait.

La runda d'atun è ida pulit pe zop per il club en quarta liga da Danis-Tavanasa. Bain ha l'equipa cumenzà cun duas victorias, suandadas èn percunter tschintg terradas en roda e l'ultim gieu da la stagiun encunter Schluein-Glion han ins gnanc pudì dar. L'equipa è stada uschè decimada entras blessuras, accidents, absenzas e grippa ch'il forfait è stà inevitabel.

Jau n'hai mai gì dapli che 12 giugaders
Autur: Sandro CathomasTrenader

Gia plirs onns è l'emprima da Danis-Tavanasa a la limita cun giugaders. L'equipa è dentant adina vegnida da sa tegnair en quarta liga. Dasperas ha l'US Danis-Tavanasa era ina equipa che dat en 5avla liga. Ins saja entant tant realistic, ch'il club na vegnia a lunga vista betg da tegnair duas equipas.

Durant la pausa d'enviern veglian ins sondar cun auters clubs en la regiun pussaivladads da collavurar e guardar sche quai è insumma ina opziun. I na giaja betg per fusiunar clubs, mabain per eventual fundar in'equipa regiunala che po dar en terza, forsa perfin en segunda liga. Quai fiss era ina opziun per giugaders ambiziunads ni era per dar ina perspectiva futura attractiva a juniors talentads en la regiun.

I n'è betg l'emprima giada ch'ina tala collavuraziun vegn discutada en Surselva. L'US Danis-Tavanasa è uss quella ch'animescha da far intgins patratgs en tge direcziun ch'i pudess ir, surtut era per sias duas equipas.

RR actualitad 17:30