Siglir tar il cuntegn

Header

cuntegn

Ballape regiunal Stagiun interrutta ed annullada

Naginas promoziuns, naginas relegaziuns: Per ils clubs da ballape en las ligas d'amaturs è la stagiun a fin.

  • Ils campiunadis 2019/2020 vegnan annullads.
  • I na dat naginas promoziuns e naginas relegaziuns d'equipas (davent da Promotion League fin 5avla liga)
  • Las concurrenzas da cup (per exempel cuppa grischuna) vegnan er interruttas.

Davent da la Promotion League fin en 5avla liga na datti nagin ballape pli questa stagiun. Era ils campiunadis da dunnas, seniors e juniors vegnan interruts ed annullads. Sco la suprastanza centrala da l'Associaziun svizra da ballape scriva, saja quai stà la suletta soluziun. La decisiun saja vegnida prendida ensemen cun las 13 federaziuns da ballape regiunalas. Lezzas avevan gia avant radund duas emnas fatg la dumonda d'interrumper ed annullar la stagiun 2019 /2020.

Betg pertutgadas èn las duas autas ligas svizras, la Super League e la Challenge League.

Plirs clubs Grischuns tutgan tar ils perdiders

Cuira 97 era suenter la stagiun d'atun a la testa da la 2. liga interregiunala. L'avantatg sin il segund era 6 puncts. La meglra equipa grischuna era sin buna via da far, suenter sis onns abstinenza, il pass en 1. liga. Cler ch'il club è trumpà in zic da la decisiun da l'Associaziun svizra da ballape.

audio
Stagiun interrutta ed annullada: Josef Müller, president Cuira 97
ord Sportissimo dals 03.05.2020.
laschar ir. Durada: 2 minutas 27 Secundas.

Il CB Domat era a la testa en 3. liga cun in'avantatg da quatter e dapli puncts sin il rest. La schanza da dumagnar la promoziun en la 2. liga regiunala era buna. Er tenor il CB Domat avessi segir anc da ulteriuras soluziuns che da simplamain annullar la stagiun 2019/2020.

audio
Stagiun interrutta ed annullada: Walter Frizzoni, president e trenader CB Domat
ord Sportissimo dals 03.05.2020.
laschar ir. Durada: 2 minutas 38 Secundas.

RTR novitads 14:00 / Sportissimo 17:00

Artitgels legids il pli savens