Siglir tar il cuntegn

Header

Marco Jola va, Carlos Rodriguez vegn.
Legenda: Marco Jola va, Carlos Rodriguez vegn Da sanestra a dretga: Carlos Rodriguez (nov trenader), Romano Bontognali (president), Amos Sciuchetti (trenader assistent) e Marco Jola (trenader partent). RTR, Roman Dobler
cuntegn

Ballape regiunal CB Schlarigna cun nov trenader

Carlos Rodriguez è il nov trenader dal CB Schlarigna. Fin qua è Rodriguez stà trenader da juniors tar il CB Schlarigna.

Durant ils davos tschintg onns è Marco Jola stà il trenader dal CB Schlarigna. Sut la batgetta da Jola è il CB Schlarigna creschì ad ina da las fermas equipas da la quarta liga. L’equipa ha terminà ils davos trais campiunadis adina sin plaz dus. Era la stagiun actuala è stada fin tar la fin atras il coronavirus ina fitg buna stagiun. Il CB Schlarigna era puspè sin plaz dus da la tabella. Pervia dal virus n'ha l’equipa dentant betg gì la schanza da cumbatter per la promoziun en terza liga.

Successiun interna

Suenter ch'igl è vegnì enconuschent che Marco Jola banduna l’equipa èn ins ì a la tschertga dad in successur. Pervia ch'il dumber da trenaders cun licenza n'è en Engiadina betg uschè grond è spert stà tema, ina successiun interna tar il CB Schlarigna. Uschia han ins pudì persvader Carlos Rodriguez ch'era trenader da juniors da surpigliar questa carica. Rodriguez è gia passa diesch onns tar il CB Schlargina e conuscha l’equipa gia fitg bain. Ensemen cun Amos Sciuchetti sco assistent surpiglia Carlos Rodriguez l’equipa cun la nova stagiun. Quella cumenza sch'il coronavius lubescha l'avust.

RTR novitads 06:00