Suenter 14 rundas da campiunadi mainan ils Engiadinais la tabella cun tschintg puncts avantatg sin ils Sursilvans. Vul Trun/Rabius pia anc salvar la schanza da gudagnar il campiunadi da quarta liga sto l’equipa che vegn trenada da Mario Solèr dispit gudagnar encunter Schlarigna. Tar in terrada è il tren pli probabel passà.
I sto constar tut per batter Schlarigna
Sin il CB Trun/Rabius spetga en mintga cas in dira nusch, quai han ils Sursilvans gia sentì tar l’emprim duel cun Schlarigna la fin settember. Lura avevan ils Engiadinais gudagnà cun 2:0. Durant che Schlarigna ha mussà fin oz ina fitg buna stagiun n’è betg i tut pli sco giavischà tar Trun/Rabius en la runda da primavaira.
Encunter il CB Surses ed en la davosa runda encunter il SC Razén ha l’equipa da la Cadi mintgamai stuì sa cuntentar cun in pari, en il derbi ordaifer encunter l’US Danis-Tavanasa hai schizunt dà ina terrada.
Il duel tranter il CB Trun/Rabius ed il FC Schlarigna cumenza la dumengia, ils 19 da matg a las 15:00 uras. Silsuenter spetgan anc l’equipa da Domat, Panaduz e Schluein Glion sin Trun/Rabius en la stagiun 2018/2019.
Sportissimo 17:05