Sviluppar vinavant il ballape e giugar in bel ballape, quai haja emprima prioritad, di Donat Albin ch’ha surpiglià ensemen cun ses collega Philippe Vincenz l’emprima equipa dal CB Trun/Rabius. Sin ils Sursilvans ch’han gudagnà la stagiun passada il campiunadi da quarta liga spetga dentant franc adversaris pli ferms en la nova stagiun. Tuttina èn ils trenaders da buna speranza, ch’els vegnian da far ina buna figura en questa terza liga, quai er suenter las bunas prestaziuns en il gieus da test sco er en il davos gieu da la cuppa svizra.
Il CB Trun/Rabius dastga en mintga cas mirar cun optimissem en l’avegnir. Il cader da l’emprima equipa dumbra passa 20 giugaders, plinavant dastga Trun/Rabius era adina puspè giugar a chasa avant blers fans. La culissa a Trun ha il davos temp er adina dà ina tala motivaziun ch’il CB Trun/Rabius è strusch stà da franar sin l’agen pastget.
Nus stuain recaltgar noss puncts en ils gieus da chasa. Avant l'agen publicum essan nus fitg ferms.
Derbis mancan
Durant che l’US Schluein Glion dat da nov en la segunda liga regiunala ed il CB Lumnezia puspè en la quarta liga è il CB Trun/Rabius la suletta equipa sursilvana en la terza liga. Uschia mancan ils derbis sursilvans en questa liga, insatge che Donat Albin deplorescha. Ma el sa legra er sin ils novs adversaris pli pauc enconuschents.
RR actualitad 23.08.2019 / Sportissimo 24.08.2019