Siglir tar il cuntegn

Header

Navigaziun

Legenda: Tadlar il audio CB Trun/Rabius cun nov schlantsch en ina liga pli auta. Durada 02:34 minutas.
Or da Actualitad dals 22.08.2019.
cuntegn

CB Trun/Rabius Il cumbat en 3. liga po cumenzar

Uss vegni serius – en las ligas regiunalas cumenza questa fin d’emna il campiunadi da ballape. Uschia er per il CB Trun/Rabius che dat da nov en la terza liga, e quai er gist cun novs trenaders, Donat Albin e Philippe Vincenz, omadus da Trun.

Sviluppar vinavant il ballape e giugar in bel ballape, quai haja emprima prioritad, di Donat Albin ch’ha surpiglià ensemen cun ses collega Philippe Vincenz l’emprima equipa dal CB Trun/Rabius. Sin ils Sursilvans ch’han gudagnà la stagiun passada il campiunadi da quarta liga spetga dentant franc adversaris pli ferms en la nova stagiun. Tuttina èn ils trenaders da buna speranza, ch’els vegnian da far ina buna figura en questa terza liga, quai er suenter las bunas prestaziuns en il gieus da test sco er en il davos gieu da la cuppa svizra.

Giugaders dal CB Trun/Rabius
Legenda: Il zercladur passà ha il CB Trun/Rabius fatg il pass enavos en 3. liga. MAD

Il CB Trun/Rabius dastga en mintga cas mirar cun optimissem en l’avegnir. Il cader da l’emprima equipa dumbra passa 20 giugaders, plinavant dastga Trun/Rabius era adina puspè giugar a chasa avant blers fans. La culissa a Trun ha il davos temp er adina dà ina tala motivaziun ch’il CB Trun/Rabius è strusch stà da franar sin l’agen pastget.

Nus stuain recaltgar noss puncts en ils gieus da chasa. Avant l'agen publicum essan nus fitg ferms.
Autur: Donat AlbinTrenader dal CB Trun/Rabius
Philippe Vincenz e Donat Albin.
Legenda: Philippe Vincenz (sanester) e Donat Albin. RTR, Andreas Wieland

Derbis mancan

Durant che l’US Schluein Glion dat da nov en la segunda liga regiunala ed il CB Lumnezia puspè en la quarta liga è il CB Trun/Rabius la suletta equipa sursilvana en la terza liga. Uschia mancan ils derbis sursilvans en questa liga, insatge che Donat Albin deplorescha. Ma el sa legra er sin ils novs adversaris pli pauc enconuschents.

RR actualitad 23.08.2019 / Sportissimo 24.08.2019