Il sport na saja betg il principal en questa situaziun da crisa, e tuttina fetschia mal da betg pudair cuntinuar cun il campiunadi, di Donat Albin, il trenader da Trun/Rabius. Mez schaner aveva l’equipa sursilvana cumenzà cun ils trenaments per er far ina buna figura en la runda da primavaira. Suenter la mesadad dal campiunadi sa chatta il CB Trun/Rabius numnadamain amez la tabella en la terza liga.
Jau hai il sentiment che nus na dettian betg pli ballape fin questa stad.
Dad in di sin l’auter è tut vegnì bittà sin il chau. Sco tut las autras equipas na dastga il mument er l’equipa da Trun/Rabius betg trenar. Donat Albin spera simplamain che ses giugaders fetschian dentant insatge durant quest temp per restar fit en il cas ch’i vess tuttina dad ir liber in di. Quai che manchia dentant saja franc il contact in cun l’auter, pertge durant in temp senza corona fissan els ussa duas fin trais giadas ad emna ensemen, uschia il trenader.
Tabella 3. liga
Actualmain è il campiunadi interrut ina giada fin la fin d’avrigl, quai ha decidì il OFV, la Federaziun da ballape da la Svizra orientala.