Siglir tar il cuntegn

Header

cuntegn

Cuira 97 Uras per far in pass enavant

Dapi la stagiun 2016/17 dat Cuira 97 en 2. liga interregiunala. Ils ultims onns ha l'equipa grischuna stuì cumbatter cunter la relegaziun. Quest onn duess quai midar.

Durant las ultimas stagiuns ha Cuira 97 savens gì en il verm. La stagiun 2017/18 han ils Grischuns evità la relegaziun pir en l'ultim gieu, la stagiun 2018/19 en il segund ultim gieu.

Cumbat da relegaziun nagin tema

Per che la relegaziun vegn quest'onn nagin tema en la chapitala grischuna, hai dà inqual midada entaifer l'equipa. Sis giugaders d'ordaifer èn da nov en il cader da Cuira 97. Per gronda part giugaders da tschep che duessan purtar vinavant l'equipa.

Transfers da Cuira 97 sin la nova stagiun

  • Stefan Cavigelli (defensur) - nov da Mels, 2.liga regiunala
  • Mario Mathis (defensur) - nov da SK Meiningen (Austria)
  • Manuel Willi (amez) - nov da Eschen/Mauren, 1.liga
  • Michel Gadient (amez) - nov da Eschen Mauren, 1.liga
  • Marco Fässler (amez) - nov da Eschen Mauren, 1.liga
  • Giuseppe Coppola (attatgader) - nov da Gossau, 1.liga

Pass per pass

La finamira saja da dar quest onn davant tiers en la tabella di il capitani da Cuira 97, Carlo Bearth. Il cader saja tenor el in toc pli ferms che l'onn passà. Cun ils novs giugaders sentia el era in nov elan entaifer l'equipa. In cumbat da relegaziun na dastgia questa stagiun propi betg dar.

La finamira da Cuira 97 è far il pass en 1. liga ils proxims onns. Gliez di il schef da sport, Mariano Di Spirito. Sch'i funcziunass gia questa stagiun fiss quai natiralmain top. Questa stagiun na saja la promoziun dentant anc betg la finamira principala.

La promoziun en 1. liga è segir in tema ils proxims 2-3 onns.
Autur: Mariano Di Spiritoschef da sport

La stagiun 2013/2014 ha Cuira 97 dà l'ultima giada ballape en 1. liga. La suprastanza sco è ils giugaders èn dentant optimistic ch'i gartegia bainbaud puspè da far il pass enavos en 1. liga.

Sportissimo 12:00