Siglir tar il cuntegn
Inhalt

Ballape regiunal Il CB Lumnezia vul metter ina chomma als da Schluein

Tar ils Lumnezians èn las emoziuns e tensiuns grondas avant il derby cunter l'US Schluein-Glion.

Legende: Video il CB Lumnezia sa prepara sin il derby cunter US Schluein-Glion abspielen. Laufzeit 02:38 Minuten.
Or da Telesguard dals 26.10.2018.

«Nus essan pronts e na vulain betg laschar turnar ils da Schluein-Glion cun il maximum da puncts ord la val.» Quai gi Giacun Vinzens, il trenader dal CB Lumnezia. El ch'è stà passa 40 onns engaschà tar il club da Schluein ha avant 4 onns surpiglià il timun dals Lumnezians e questa primavaira manà il club si en terza liga.

Ils Lumnezians san bain da las qualitads da l'adversari ch'arriva sco leader a Vella per il derby. Giugar concentrà e disciplinà ed empruvar da tegnair uschè ditg sco pussaivel il 0:0 è la devisa. Cun tut las fischas e constellaziuns è Giacun Vinzens conscient ch'i vegn a dar in dir cumbat. Fastidis fan al trenader ses cader, ch'è pulit decimà. Dals total 20 giugaders èn 7 blessads. Tuttina spera il CB Lumenzia dad almain giugar in pari e metter in punct sin lur conto.

Il capo-tiragols en terza liga è in Lumnezian

Ils da Schluein-Glion èn bain ils emprims en la tabella. Ils pli blers gols ha dentant Yanick Demont dal CB Lumnezia fatg en questa stagiun – en tut 10. E gugent tutgass el er en il derby. Sia confidenza è scadin cas gronda. Ils giugaders Lumnezians èn conscients davart las emoziuns e tensiuns da quest derby. Er il pled rivalitad croda.

Però schebain ils giugaders da Schluein-Glion sco era ils Lumnezians quintan cun in gieu fair. Bain savend ch'i dovra tut tenor fitg pauc sin il plaz che po dar fieu a las emoziuns. Ma derbys èn auters gieus ch'auters, pli dirs ed intensivs. E sche Giacun Vinzens sa regorda da ses 45 onns ch'el è uss engaschà en il ballape regiunal, na possia el strusch sa regurdar da propi bels e buns gieus da derby.

RR actualitad 08:00